Фарғона вилояти ҳокими Хайрулло Бозоров Хитойлик инвесторлар делегациясини қабул қилди

Тошкент, Ўзбекистон (UzDaily.uz) — Фарғона вилояти ҳокими Хайрулло Бозоров Риштон туманида бир гуруҳ хитойлик инвесторларни қабул қилди

Мулоқот чоғида вилоятимизда хитойлик инвесторлар томонидан ташкил этилиши режалаштирилаётган меҳмонхона хизмати, сиҳатгоҳлар, мактаб қурилиши, тиббий жиҳозлар ишлаб чиқариш бўйича истиқболли лойиҳалар муҳокама қилинди.

Фарғона вилояти бугунги кунда инвесторлар учун энг жозибадор ҳудудлардан бирига айланиб бораётганини қайд этган хитойлик инвесторлар вилоят ҳудудида янги лойиҳаларга инвестиция киритиш ниятида эканликларини маълум қилиб, ўз бизнес режаларини тақдим этдилар.

Вилоят ҳокими кўзда тутилган лойиҳаларни ҳаётга татбиқ этиш учун ҳар томонлама кўмак беришга тайёр эканлигини билдирди.

Учрашувда лойиҳаларни тайёрлаш ҳамда музокараларни давом эттиришга келишиб олинди.