Тошкент, Ўзбекистон (UzDaily.uz) — Citigroup молия корпорацияси Ўзбекистонда ўз ваколатхонасини расман очганини маълум қилди. Бу ҳақда компания LinkedIn платформасида хабар берди.

Компания вакили Грант Карсоннинг таъкидлашича, Citigroup сўнгги йигирма йилдан зиёд вақт давомида Ўзбекистондаги мижозларига қўллаб-қувватлаш кўрсатиб келган бўлса-да, бугунги кунда мамлакатда кузатилаётган иқтисодий ўсиш ва давом этаётган ислоҳотлар маҳаллий бозорда ўз иштирокини кенгайтириш учун қулай шароит яратди.

Унинг сўзларига кўра, ваколатхона очилиши компания фаолиятида янги саҳифани очади, мижозлар ва ҳамкорларга янада яқин бўлиш, уларнинг жаҳон бозорларига чиқишини қўллаб-қувватлаш имконини беради.

Карсон, шунингдек, ҳукумат ва маҳаллий мижозлар вакиллари билан учрашувлар чоғида гувоҳ бўлган энергия, истиқбол ва салоҳиятдан катта таассурот олганини билдирди ва Citigroup компанияси Ўзбекистондаги миллий ва халқаро мижозларнинг янги лойиҳаларни амалга оширишларида қўллаб-қувватлашни давом эттиришини таъкидлади.

Аввалроқ, жорий йилнинг 10 июлида Ўзбекистон Марказий банки Citigroup’нинг Туркиядаги филиали — CitiBank AS компаниясининг ваколатхонасини расман аккредитация қилган эди.

Ушбу лицензия уч йил муддатга берилиб, 2028 йил 9 июлгача амал қилади. Ваколатхона раҳбари этиб Аббос Жўрабоев тайинланган.