CBP Ўзбекистон, Қирғизистон ва Россиядан бўлган 13 нафар фуқарони Пуэрто-Рикога ноқонуний олиб ўтиш уринишини тўхтатди

Тошкент, Ўзбекистон (UzDaily.uz) — АҚШ Божхона ва чегарани муҳофаза қилиш хизмати (CBP) Пуэрто-Рикога йўналган парусли яхта орқали Ўзбекистон, Қирғизистон ва Россиядан бўлган 13 нафар фуқарони ноқонуний равишда чегарадан ўтказиш уринишини фош этди.

Ҳодиса жорий йилнинг 12 октябрь, якшанба куни Комбате пляжи қирғоқлари яқинида содир бўлган. Air and Marine Operations (AMO) хизматининг тезкор бўлинмалари 41 фут узунликдаги яхтани аниқлаб, унинг ҳаракатини оролнинг ғарбий қисмигача кузатиб борди.

АҚШ Қирғоқ қўриқчиси ҳамда Пуэрто-Рико полициясининг тезкор ҳаракат бўлинмаси FURA ёрдамида яхта тўхтатилиб, Michel бўлинмасига текширув учун етказилди.

Кема бортида Ўзбекистондан бўлган ўн нафар эркак, Қирғизистондан бир аёл ва Россиядан икки эркак борлиги аниқланди. Йўловчиларнинг ҳеч бири АҚШ ҳудудига қонуний кириш ҳуқуқини тасдиқловчи ҳужжатга эга эмас эди.

Барча ушланган шахслар соғ-саломат ҳолда АҚШ Ички хавфсизлик вазирлиги таркибидаги Тергов бошқармасига (Homeland Security Investigations) олиб борилди ва уларга нисбатан қонун доирасидаги иш юритуви бошланди.