Буюк Британия Элчихонаси ва БМТ Тараққиёт Дастури Ўзбекистонда аёлларнинг етакчилигига бағишланган юқори даражадаги учрашувни ўтказди

Тошкент, Ўзбекистон (UzDaily.uz) — Буюк Британия ва Бирлашган Миллатлар Ташкилоти Тараққиёт Дастури (БМТ Тараққиёт Дастури) аёлларнинг етакчилик салоҳиятини ривожлантириш учун шароит яратиш бўйича стратегияларни муҳокама қилиш мақсадида юқори даражадаги нонушта учрашувини ўтказди.

Тадбирда собиқ Янги Зеландия Бош вазири ва собиқ БМТ Тараққиёти Дастури Бош Администратори Рт Ҳон. Ҳелен Кларк ҳамда Ўзбекистоннинг барча ҳокимият тармоқларидан етакчи аёллар иштирок этди.

Учрашувда Олий Мажлис, Судьялар Кенгаши, вазирликлар ва Президент Администрацияси ҳамда соҳанинг етакчи вакиллари иштирок этди. Тадбирнинг ҳамраислари сифатида Буюк Британиянинг Ўзбекистондаги Фавқулодда ва Мухтор Элчиси Тимоти Смарт ва БМТ Тараққиёт Дастурининг Ўзбекистондаги доимий вакиласи Акико Фужии қатнашди.
Мулоқот аёлларнинг етакчи сифатида ўз салоҳиятини рўёбга чиқариши ва келажакни шакллантиришига имкон берадиган шароитларни яратиш масалаларига қаратилди. Ҳелен Кларк Янги Зеландия Бош вазири ва БМТ Тараққиёт Дастури Бош администратори лавозимидаги фаолияти давомида орттирган тажрибаси ва сабоқлари билан бўлишди. Унинг фикрлари аёлларнинг можаролар, иқлим ўзгариши ва тенгсизлик шароитида қандай қилиб бардошли ва самарали етакчи бўлиши мумкинлиги ҳақида илҳомлантирувчи мулоқотга сабаб бўлди.

Иштирокчилар институционал тўсиқларни бартараф этиш, инклюзив қарор қабул қилиш жараёнларини ривожлантириш ва барча даражаларда аёлларнинг етакчилигини қўллаб-қувватлайдиган тизимларни яратиш бўйича амалий стратегияларни муҳокама қилдилар.
Буюк Британиянинг Ўзбекистондаги элчиси Тимоти Смарт мулоқотнинг аҳамиятини алоҳида таъкидлади.

“Аёл етакчиларни қўллаб-қувватлаш фақат адолат масаласи эмас - барқарор институтлар ва инклюзив жамиятлар барпо этишнинг муҳим шартидир. Бугунги Ҳелен Кларк ва Ўзбекистоннинг илғор аёл етакчилари билан бўлган суҳбат Буюк Британиянинг гендер тенглигини барқарор ривожланиш ва самарали бошқарувнинг асосий устуни сифатида қўллаб-қувватлашга содиқлигини яна бир бор тасдиқлайди,” деди элчи.

Тадбир давомида БМТ Тараққиёт Дастурининг Гендер тенглиги сертификати дастури алоҳида эътироф этилди. Ушбу глобал ташаббус ташкилотларга гендер тенглигини сиёсат ва амалиётларига чуқур сингдиришга кўмаклашади. Давлат Божхона қўмитасининг яқинда Кумуш сертификатга эришгани Ўзбекистоннинг гендер тенглик йўлида муҳим ютуқ сифатида қайд этилди. Қўмита нафақат Ўзбекистонда, балки Марказий Осиёда ушбу сертификатни қўлга киритган биринчи давлат ташкилоти ҳисобланади.

БМТ Тараққиёт Дастурининг Ўзбекистондаги доимий вакиласи Акико Фужии ташкилотларни етакчи бўлишга ва трансформацион ўзгаришларни қўллаб-қувватлашга чақирди.

“БМТ Тараққиёт Дастури Гендер тенглиги сертификати оддий сертификат эмас, балки институтларни ичкаридан ўзгартиришга қаратилган мажбуриятдир. Гендер тенглигини амалиётга жорий этиш орқали аёллар етакчилик қилиши, инновация яратиши ва муваффақиятга эришиши мумкин бўлган иш муҳитини яратамиз. Биз барча ҳамкорларни жасорат билан ҳаракат қилишга чақирамиз, чунки гендер тенглиги нафақат принцип, балки инновация, барқарорлик ва тараққиётнинг кучли драйверидир. Биргаликда биз мажбуриятларни реал ўзгаришга айлантира оламиз,” деди Акико Фужии.