Бекободда 19 ёшли ўзбекистонлик Украина ҳудудидаги қуролли можарода иштирок этгани учун судланди

Тошкент, Ўзбекистон (UzDaily.uz) — Бекобод туман жиноят ишлари бўйича судида Ўзбекистоннинг 19 ёшли фуқароси Д. Х.га нисбатан иш кўриб чиқилиб, у ёлланмачиликда айбли деб топилди.

Иш материалларига кўра, 2025 йил май ойида ёш йигит ишлаш мақсадида Россияга йўл олган. У ерда Telegram мессенжери орқали Акбар исмли шахс билан танишиб, у Д. Х.га психотроп моддаларни ташиш билан шуғулланишни таклиф қилган.

Август ойида Д. Х. навбатдаги наркотик етказиб бериш пайтида ҳуқуқни муҳофаза қилувчи органлар томонидан қўлга олинган. Шундан сўнг унга нисбатан жиноят иши қўзғатилиб, тергов ҳибсхонасига жойлаштирилган. Изоляторда унга ҳарбий шартнома имзолаш таклиф қилиниб, бу орқали умрбод озодликдан маҳрум этилишдан қутулиш мумкинлиги айтилган.

Шартнома имзолангандан кейин Д. Х. Украинанинг Запорожье вилоятига юборилган. У ерда ҳарбий тайёргарликдан ўтиб, танкда зарядловчи сифатида хизмат қилган ва маош олган. Кейинчалик унда аппендицит ташхиси қўйилиб, ҳарбий госпиталга юборилган. У ердан 9 кун ўтгач қочиб кетган.

Москвага етиб келгач, ёш йигит Ўзбекистон элчихонасига мурожаат қилиб, «Ватанга қайтиш сертификати»ни олган ва 2025 йил ноябрь ойида мамлакатга қайтган.

Судда аниқланишича, Д. Х. Instagram ижтимоий тармоғида саҳифа юритиб, Россия ҳарбий формасида, жанговар қурол ва техника билан тушган суратларни жойлаштирган, шунингдек араб ва рус тилларида диний нашидлар тарқатган.

Бекобод туман суди уни Ўзбекистон Республикаси Жиноят кодексининг 154-моддаси 1-қисми («Ёлланмачилик») билан айбли деб топиб, умумий тартибдаги колонияда 5 йил муддатга озодликдан маҳрум этиш жазосини тайинлади.