Бахтиёр Хайдаров Ўзбекистоннинг Янги саноат кооперацияси ва Давлат харидлари агентлигига раҳбар бўлди

Тошкент, Ўзбекистон (UzDaily.uz) — Ўзбекистон Республикаси Президенти Шавкат Мирзиёев Бахтиёр Хайдаровни Янги саноат кооперацияси ва Давлат харидлари агентлиги директори этиб тайинлаш тўғрисида фармон имзолади.

Бахтиёр Хайдаров бугунга қадар Тошкент шаҳар ҳокимининг молия-иқтисодий фаолият ва камбағалликни камайтириш масалалари бўйича биринчи ўринбосари лавозимида фаолият юритган.

Агентлик Ўзбекистон Республикаси Президентининг «Ички ишлаб чиқаришни ривожлантириш ва янги тизим асосида саноат кооперациясини такомиллаштириш бўйича устувор чора-тадбирлар тўғрисида»ги фармони асосида ташкил этилган.

Агентликни ташкил этиш ички ишлаб чиқариш ва саноат кооперациясини тизимли ривожлантириш бўйича кенг қамровли дастурнинг бир қисми ҳисобланади.

Янги тузилма давлат харидлари соҳасида Иқтисодиёт ва Молия вазирлиги функцияларини ўз зиммасига олади, шунингдек юқори технологияли ва рақобатбардош маҳсулот ишлаб чиқаришни кенгайтириш дастурларини ишлаб чиқиш ва амалга оширишни мувофиқлаштиради.

Агентлик корхоналар ва ҳудудларга методик ва амалий ёрдам кўрсатади, қўшилган қиймат занжирларини шакллантириш ва инновацион технологияларни жорий этиш орқали ўзбек корхоналарини глобал ишлаб чиқариш ва савдо тармоқларига интеграция қилишни қўллаб-қувватлайди.

Афзаллик бериладиган соҳалар қаторида фармацевтика, электротехника, электроника, робототехника, автомобилсозлик, қурилиш материаллари ишлаб чиқариш, газ ва нефть химияси, енгил ва озиқ-овқат саноати ҳамда юқори инвестиция салоҳиятига эга асосий соҳалар учун дастурлар ишлаб чиқилади.

Дастурлар саноат эҳтиёжлари, ҳудудий хусусиятлар ва хорижий тажрибаларни ҳисобга олган ҳолда шакллантирилади, Агентлик билан келишилади ва Бошқарув кенгаши томонидан тасдиқланади.