Тошкент, Ўзбекистон (UzDaily.uz) — Ўзбекистон Республикаси Ички ишлар вазирлиги ҳузуридаги Тергов департаменти томонидан Тошкент шаҳри ва бир қатор ҳудудларда сохта автолизинг компаниялари ташкил қилган шахслар гуруҳига нисбатан йирик миқёсдаги фирибгарлик ишлари юзасидан жиноят иши қўзғатилди.

Расмий маълумотларга кўра, ушбу шахслар (суратда акс этганлар) ижтимоий тармоқлар орқали фуқароларни жалб этиш мақсадида Umid avto companies, Umid Savdo Fayz Invest, Umid Avto Lizing, Orient Auto, Ilgor Lizing, Avto Ijara Hizmati каби номлар билан масъулияти чекланган жамиятлар ташкил қилган.

Бу компаниялар фуқароларга 6–12 фоизли паст ставкаларда автомашина харид қилишни таклиф этиб, улар билан олдиндан (аванс асосида) шартномалар тузган. Бироқ шартномаларда кўрсатилган 120 кун ичида машиналарни етказиб бериш ваъдаси бажарилмаган.

Тергов натижаларига кўра, мижозлардан олинган пуллар ташкилотчилар томонидан ўзлаштирилгани аниқланган. Жами 843 нафар фуқаро жабр кўрган бўлиб, уларга етказилган моддий зарар миқдори 50,1 миллиард сўмни ташкил этган.

Тергов доирасида мазкур компаниялар номида бўлган 339 та транспорт воситаси тегишли тартибда ҳужжатлаштирилди. 9 нафар шахсга нисбатан айблов эълон қилинди ва уларга нисбатан эҳтиёт чораси сифатида қамоққа олиш белгилаб қўйилди.

Жиноят ишларини мувофиқлаштириш мақсадида ички ишлар вазири ўринбосари, полковник Рамазон Ашуров бошчилигида Махсус оператив штаб ташкил этилди. Штаб ҳар куни соат 09:00 дан 21:00 гача ИИВ Транспорт ва туризм объектларида хавфсизликни таъминлаш департаменти биносида фаолият юритади.

Фуқаролардан юқоридаги шахслар томонидан содир этилган ноқонуний ҳаракатлар тўғрисидаги маълумотлар бўйича штабга мурожаат қилиш сўралмоқда. Шунингдек, ушбу схемалардан жабрланганлар ҳам мурожаат этишлари мумкин.

Манзил: Тошкент шаҳри, Тарас Шевченко кўчаси, 62-уй Телефон: (71) 256-79-39
Қисқа рақам: 102