Тошкент, Ўзбекистон (UzDaily.uz) — Хитой Электроника Савдо Палатаси (СEСС), «Ўзелтехсаноат» уюшмаси ва "Artel Electronics" компанияси ўртасида уч томонлама англашув меморандуми имзоланди.

Тошкент шаҳрида Хитой Электроника Савдо Палатаси (СEСС) президенти Ван Нинг бошчилигидаги делегация ташрифи доирасида муҳим келишувга эришилди. Тадбирда «Ўзелтехсаноат» уюшмаси раиси Мирзиёд Юнусов ҳамда “Akfa Group” компанияси асосчиси Жаҳонгир Ортиқхўжаев иштирок этди.

Учрашув давомида томонлар Ўзбекистон ва Хитой ўртасидаги иқтисодий ва технологик ҳамкорликни янада ривожлантириш масалаларини муҳокама қилдилар. Натижада электроника, электротехника ва юқори технологиялар соҳасида кенг қамровли уч томонлама англашув меморандуми имзоланди.

Мазкур келишув маҳаллий ишлаб чиқариш қувватларини кенгайтириш, қўшма инновацион лойиҳаларни амалга ошириш, замонавий технологияларни жорий этиш ҳамда илмий-тадқиқот фаолиятини ривожлантиришни назарда тутади.

Шунингдек, меморандум доирасида экспорт бозорларини кенгайтириш, халқаро кооперацияни мустаҳкамлаш ва янги инвестиция лойиҳаларини ҳаётга татбиқ этиш бўйича ҳамкорлик қилиш режалаштирилган. Бу келишув икки давлат бизнес доиралари ўртасида барқарор шерикликни таъминлаб, Ўзбекистонда электротехника саноатини янги босқичга олиб чиқиши кутилмоқда.

Тадбир якунида Ван Нинг Ўзбекистонда яратилаётган инвестициявий шароитларни юксак баҳолади ва келгусида қўшма лойиҳаларни амалга оширишда СEСС аъзолари фаол иштирок этишини таъкидлади.