Тошкент, Ўзбекистон (UzDaily.uz) — АҚШ Марказий Осиёдан ноқонуний йўллар билан мамлакатга кириб келган 130 дан ортиқ муҳожирни Ўзбекистонга депортация қилди. Бу ҳақда АҚШ Ички хавфсизлик вазирлигининг баёнотида қайд этилган.

Қозоғистон, Қирғизистон ва Ўзбекистон фуқароларининг депортацияси чоршанба куни амалга оширилган.

Вазирлик таъкидлашича, Ўзбекистон ўз фуқароларининг қайтиши учун барча харажатларни тўлиқ молиялаштирган. Бу эса, уларнинг фикрича, хавфсизлик соҳасидаги ҳамкорликнинг юксак даражасидан далолат беради ва АҚШнинг бошқа иттифоқчилари учун намуна бўлиши мумкин.

АҚШнинг Ички хавфсизлик вазири Кристи Ноэм Ўзбекистон Президенти Шавкат Мирзиёевга кўрсатилган қўллаб-қувватлов учун миннатдорчилик билдирди.

«Ўзбекистон Президенти Шавкат Мирзиёевнинг 131 нафар ноқонуний муҳожирни ватанига қайтариш рейсини ташкил этишдаги етакчилигини юксак баҳолаймиз», — деди вазир Ноэм. — «Биз Ўзбекистон билан қонун устуворлигини таъминлаш ва умумий хавфсизлигимизни мустаҳкамлаш мақсадида келгусида ҳамкорликни давом эттиришга умид қиламиз».