Ant Yapi ва Stellar Construction компаниялари Фарғона расмийлари билан учрашувда ўз лойиҳаларини тақдим этдилар

Тошкент, Ўзбекистон (UzDaily.uz) — Вилоят ҳокимлигида Туркиянинг “Ant Yapi” қурилиш компанияси координатори Токман Ҳайрий бошчилигидаги делегация билан учрашув бўлиб ўтди.

Мулоқотда ушбу компания Буюк Британия, АҚШ, Туркия, Россия каби турли давлатларда йирик қурилиш, турар жой, меҳмонхона ва инфратузилма лойиҳаларини муваффақиятли амалга ошириб келаётгани қайд этилди.

Шунингдек, учрашувда Ant Yapi Holding гуруҳи таркибига кирувчи ва асосий офиси Россияда бўлган “Stellar Construction” компаниясининг мураккаб саноат қурилиши йўналишидаги лойиҳалари тақдимот қилинди.

Вилоят ҳокими ўринбосари Шерзоджон Полвонов Фарғона вилоятида катта бунёдкорлик ишлари олиб борилаётгани, кўплаб саноат зоналари қурилаётгани ҳақида тўхталиб, аниқ лойиҳалар асосида ҳамкорликни йўлга қўйиш имкониятларига эътибор қаратди. Бу борада келгусидаги чора-тадбирлар келишиб олинди.