Али Хоманаийнинг ўғли Эроннинг янги олий раҳбари этиб сайланди

Тошкент, Ўзбекистон (UzDaily.uz) — Эрон Экспертлар кенгаши АҚШ ва Исроил зарбалари натижасида ҳалок бўлган Oятулло Али Хоманаийнинг ўғли Можтабо Хоманаий Ислом Республикасининг учинчи олий раҳбари этиб сайланганини тасдиқлади. Бу ҳақда Tasnim агентлиги Кенгашнинг расмий баёнотига таяниб хабар берди.

«Бугунги йиғилишда Экспертлар кенгашининг ҳурматли вакиллари томонидан бир овоздан қабул қилинган қарорга асосан Oятулло Саййид Можтабо Хоманаий (Аллоҳ уни асрасин) Эроннинг олий раҳбари сифатида тақдим этилади», — дейилади баёнотда.

Кеча кечқурун Экспертлар кенгаши аъзоси Oятулло Ҳусайний Эшкварий Reuters агентлигига берган интервьюсида янги олий раҳбар Хоманаий фамилиясига эга шахс бўлишини тасдиқлаган эди. Эрон Миллий хавфсизлик олий кенгаши котиби Али Лорижоний эса Хоманаийнинг ўғли АҚШ президенти Дональд Трамп томонидан Экспертлар кенгаши йиғилишига зарба бериш таҳдидларига қарамасдан сайланганини таъкидлади.

Ислом инқилоби муҳофизлари корпуси Можтабо Хоманаийга садоқат билан қасамёд қилди ва унинг кўрсатмаларига амал қилишга тайёр эканини билдирди.

Эроннинг аввалги олий раҳбари Али Хоманаий АҚШ ва Исроилнинг ҳарбий операциясининг биринчи куни — 28 февралда ўлдирилганидан сўнг мамлакатда 40 кунлик мотам эълон қилинган. Ҳозирча республика бошқаруви вақтинчалик раҳбарлар кенгаши томонидан амалга оширилмоқда. Унинг таркибига президент Масъуд Пезешкиён, суд ҳокимияти раҳбари Ғулом-Ҳусайн Моҳсений Эжеий ва Конституция муҳофизлари кенгаши аъзоси Алирезо Арофий кирган.