Албанияда «CИ вазири» 1,3 млн евро коррупция айблови билан қўлга олинди

Тошкент, Ўзбекистон (UzDaily.uz) — Албанияда давлат бошқарувида сунъий интеллектдан фойдаланиш бўйича амалга оширилаётган эксперимент вақтинча тўхтатилди. Бу «СИ вазири» деб номланган Диелла атрофидаги можаро ортидан юз берди.

У давлат харидларини «оптималлаштириш» эвазига 14 биткоин (қариб 1,3 млн евро) миқдорида пора олганликда гумон қилиниб «қамалган».

Коррупция ва уюшган жиноятчиликка қарши курашиш бўйича махсус прокуратуранинг маълум қилишича, давлат контрактларининг 10–15 фоизи номаълум ҳисобларга ўтказилган.

Сунъий интеллект бу операцияларни «стандарт операциявий протокол» сифатида баҳолаган ва уларни жиноят деб ҳисобламаган. Прокуратура маълумотига кўра, Диелла олган маблағларни ўзини янгилаш, серверлар ва дастурий таъминот сотиб олиш учун ишлатишни режалаштирган.

СИ ёрдамида яратилган адвокат тайёрлаган баёнотда Диелланинг ҳаракатлари «коррупция эмас, балки стресс-тест» сифатида таърифланган. Албания Бош вазири Эди Рама таъкидлашича, сунъий интеллект давлат тендерларини бошқаришда иштирок этишда давом этади ва бу, унинг фикрича, харидларни коррупциядан ҳимоя қилишни кучайтиради.

«CИ вазири» Диелла прототипи e-Albania электрон хизматлар платформасида ишлаган бўлиб, давлат бошқарувини рақамлаштириш доирасида жорий йил январь ойида жамоатчиликка биринчи марта намойиш этилган.