Adnoc Ўзбекистондаги «Лукойл» активларига қизиқиш билдирмоқда

Тошкент, Ўзбекистон (UzDaily.uz) — Abu Dhabi National Oil Co. (Adnoc) АҚШ санкциялари остида бўлган Россиянинг «Лукойл» нефть-газ компаниясининг Ўзбекистондаги активларини сотиб олиш имкониятини кўриб чиқмоқда, дея хабар берди Bloomberg.

Агентликнинг маълумотларига кўра, америкалик нефть гигантлари Exxon ва Chevron «Лукойл»нинг Ироқ ва Қозоғистондеги улушларига қизиқиш билдирмоқда. Шу билан бирга, «Лукойл»нинг ўзи хорижий активларини ягона пакет сифатида сотишни режалаштирмоқда.

Ўзбекистонда «Лукойл» Кандем–Ҳаузак–Шоди ва Жануби-Ғарбий Ҳиссор лойиҳалари бўйича маҳсулотни бўлишиш тўғрисидаги келишувлар (PSA) асосида газ қазиб чиқариш ва қайта ишлаш, шунингдек, ёқилғи қуйиш шоҳобчалари тармоғини бошқариш билан шуғулланади. Компаниянинг мамлакатга киритган умумий инвестициялари 10 миллиард доллардан ошган бўлиб, уни газ соҳасидаги энг йирик хорижий инвесторлардан бирига айлантиради.

2025 йил октябр ойида АҚШ Молия вазирлиги Россиянинг «Роснефть» ва «Лукойл» нефть компаниялари ҳамда уларнинг таркибидаги қатор тузилмаларга нисбатан янги санкциялар жорий этилганини эълон қилди.

Рестрикциялар «Роснефть»нинг 28 та ва Россияда жойлашган «Лукойл»нинг 6 та дочер корхонасини қамраб олди.