15,5 млн йўловчи: Uzbekistan Airports 2025 йил якунларини сарҳисоб қилди

Тошкент, Ўзбекистон (UzDaily.uz) — 2025 йил Uzbekistan Airports учун фаолиятнинг барча асосий йўналишлари бўйича барқарор ўсиш даври бўлди.

Йил якунларига кўра, 2024 йилга нисбатан йўловчи оқими, авиарейслар сони ва юк ташиш ҳажмлари бўйича ижобий динамика қайд этилди.

Январь ойидан декабрь ойигача Ўзбекистон аэропортлари 128 972 та авиарейсга хизмат кўрсатди, бу ўтган йил кўрсаткичидан 14 фоизга кўпдир.

Шундан 92 480 та рейс халқаро йўналишларга, 36 492 та рейс эса ички йўналишларга тўғри келди.

2025 йил якунлари бўйича умумий йўловчи оқими 15 504 264 нафарни ташкил этди, бу 2024 йилга нисбатан 15 фоизга юқори.

Халқаро рейслардан 12 707 101 нафар йўловчи, ички рейслардан эса 2 797 163 нафар йўловчи фойдаланди.

Юк сегментида ҳам ижобий ўсиш кузатилди. 2025 йилда мамлакат аэропортлари орқали 98 137 тонна юк ва почта жўнатмалари ташилди, бу ўтган йилга нисбатан 12 фоизга кўп.

Ҳисобот даврида авиақатнов географияси ҳам кенгайди: Ўзбекистон аэропортларига тўртта янги йўловчи авиакомпания кириб келди — Хитойнинг Air China ва China Eastern, Кореянинг T’Way ҳамда Малайзиянинг AirAsia авиакомпаниялари.

2025 йил якунлари Ўзбекистон авиация соҳасининг изчил ривожланаётганини, халқаро ҳаракатчанликнинг ошиб бораётганини ва ички авиақатновнинг босқичма-босқич кенгайиб бораётганини кўрсатмоқда.