12 март куни метан заправкаларига янги чеклов жорий этилди

Тошкент, Ўзбекистон (UzDaily.uz) — 12 март, пайшанба куни Ўзбекистонда автомобиль газ тўлдириш компрессор станциялари (АГTКС) фаолиятига нисбатан чекловлар кучайтирилади. Бу ҳақда Энергетика вазирлиги матбуот хизмати хабар қилди.

Идора маълумотига кўра, метан ёқилғи қуйиш шохобчалари фақат жамоат транспортига, шунингдек ижтимоий муассасаларга хизмат кўрсатувчи автомобилларга хизмат кўрсатади.

Вазирлик тушунтиришича, мазкур қарор магистрал газ қувурларида газ босимининг пасайиши билан боғлиқ. Табиий газ билан таъминлашда анъанавий тарзда аҳоли ва ижтимоий соҳа объектларига устувор аҳамият берилади.

Таъкидланишича, мутахассислар магистрал газ қувурларида босимни тиклаш бўйича чоралар кўрмоқда. Шу билан бирга транспорт учун муқобил ёқилғини таъминлаш мақсадида савдога чиқарилаётган автомобиль бензини ва суюлтирилган газ (пропан) ҳажмлари ҳам оширилмоқда.

Энергетика вазирлиги хусусий ёқилғи қуйиш шохобчалари эгаларини нархларни сунъий равишда оширмасликка, ёқилғининг муносиб сифатини ва етарли ҳажмда сотилишини таъминлашга чақирди.

Идора маълумотига кўра, ёқилғи бозорида қонунбузарликларнинг олдини олиш мақсадида ваколатли органлар назорат тадбирларини кучайтирмоқда.