ЮНИСЕФ Ўзбекистонда таълим тизимини рақамли трансформация қилиш зарурлигини таъкидлади

Тошкент, Ўзбекистон (UzDaily.uz) — Ўқитувчи ва устозлар куни муносабати билан ташкилот мамлакатда педагогларнинг асосий ўрнини эътироф этди. ЮНИСЕФ маълумотларига кўра, мактабларда 540 минг, мактабгача таълим муассасаларида эса 174 минг педагог фаолият кўрсатмоқда ва улар ҳар куни янги авлоднинг кўникма ҳамда қадриятларини шакллантиришга ҳисса қўшмоқда.

ЮНИСЕФнинг Ўзбекистондаги ваколатхонаси раҳбари Рехина Кастижио шундай дейди: «Ўқитувчилар — таълимнинг пойдевори ва ўзгариш ҳамда инновацияларнинг ҳаракатлантирувчи кучидир. Технология ва сунъий интеллект уларни алмаштирмаслиги керак, аксинча, улар технологиядан унумли фойдаланиш, ўқув жараёнини шахсийлаштириш, ижодий руҳлантириш ва ҳар бир боланинг имкониятларини кенгайтириш қобилиятига эга бўлиши лозим».

ЮНИСЕФ Ўзбекистон ҳукумати билан ҳамкорликда педагогларнинг касбий ўсишини, рақамли янгиликларни жорий этиш ва таълимда инклюзив амалиётларни қўллаб-қувватлашни давом эттирмоқда. Амалга оширилган ташаббуслар қаторида сунъий интеллект асосида математика ўқитиш сифатини яхшилаш учун ишлаб чиқилган воситалардан фойдаланиш, натижадорликни 17 фоизга оширган Eduten ва Teacher Pro пилот лойиҳалари, шунингдек, қарийб 40 минг тарбиячи учун имконият яратган Bolalik Akademiyasi платформаси мавжуд.

Шу билан бирга, Ислом тараққиёт банки кўмагида Jalinga студияси аралаш таълим учун сунъий интеллект асосида рақамли ва мультимедиавий ресурслар тайёрламоқда. Бу ташаббус педагоглар салоҳиятини ошириш ҳамда таълим жараёнини замон талабига мос равишда модернизация қилиш имконини бермоқда.

ЮНИСЕФ ва Мактабгача ҳамда мактаб таълими вазирлиги беш йил ичида барча педагогларни замонавий методика ва рақамли кўникмалар билан қамраб олишни мақсад қилган. Дастур тез суръатда ўзгариб бораётган замонда 6,5 миллиондан зиёд мактаб ўқувчилари ва қарийб 2,4 миллион мактабгача ёшдаги болалар учун таълим сифатига сезиларли даражада таъсир кўрсатиши кутилмоқда.

Рехина Кастижио: «Ўқитувчи ва устозлар кунида биз Ўзбекистон бўйлаб 600 мингдан ортиқ педагогларни миллий ислоҳотларнинг ҳақиқий муаллифлари ва инсон капитали тараққиётининг ҳаракатлантирувчи кучлари сифатида қадрлаймиз», — дея таъкидлади.