Тошкент, Ўзбекистон (UzDaily.uz) — Олий Мажлис Қонунчилик палатасининг навбатдаги мажлиси бўлиб ўтди. Мажлисда дастлаб, Ўзбекистон Республикаси Олий Мажлиси Қонунчилик палатасининг Ёшлар масалалари бўйича комиссиясини тузиш тўғрисидаги масала атрофлича кўриб чиқилди.

Таъкидланганидек, сўнгги йилларда мамлакатимизда ёшларга оид давлат сиёсати соҳасида кенг кўламли ишлар амалга оширилмоқда. Ўтган қисқа даврда мамлакатимизда ёшлар билан ишлаш бўйича мутлақо янги тизим яратилиб, уларнинг қонуний ҳуқуқ ва манфаатларини таъминлаш давлат сиёсатининг энг устувор йўналишига айланди.

Ёшларни давлат томонидан қўллаб-қувватлаш бўйича ҳуқуқий база мустаҳкамланиб, ўтган қисқа даврда ушбу йўналишда 100 дан ортиқ қонун ҳужжатлари қабул қилинди. Натижада ёшлар билан давлат ҳокимияти органлари ўртасидаги муносабатларнинг ҳуқуқий асослари ҳар қачонгиданда мустаҳкамланди.

Ёшларга оид давлат сиёсатини амалга оширишда парламент ва ёшлар ҳамкорлиги муҳим аҳамият касб этади. Уларни ҳар томонлама қўллаб-қувватлаш, ёш авлоднинг ижтимоий-сиёсий фаоллигини ошириш борасидаги ислоҳотлар парламент ҳаётида ҳам ўз ифодасини топмоқда.

Мамлакатимиз Президентининг шу йил 14 февраль куни ёшлар билан мулоқоти навқирон авлод ҳаётида том маънода янги саҳифалар очди. Учрашувда давлатимиз раҳбари ёшларнинг таълим олиши, бандлигини таъминлаш, жамиятда ўз ўрнини топиши учун зарур шароитлар яратиш мақсадида бир қатор муҳим ташаббуслар илгари сурилди.

Хусусан, ёшларни қўллаб-қувватлаш, уларнинг салоҳиятини рўёбга чиқариш соҳасида олиб борилаётган ислоҳотларда Қонунчилик палатасининг иштирокини янада кенгайтириш мақсадида Ёшлар масалалари бўйича комиссияни тузиш ташаббуси билдирилган эди.

Мажлисда депутатлар ёшларнинг салоҳиятини рўёбга чиқариш, уларнинг ижтимоий-иқтисодий ва сиёсий фаоллигини ошириш, замонавий дунёқараш, билим ва кўникмаларга эга йигит-қизларни ҳуқуқий билимларини юксалтиришда Ёшлар масалалари бўйича комиссиясининг ўрни ва роли муҳим аҳамиятга эга эканлигини алоҳида қайд этдилар.

Шунингдек, Комиссия ёшлар масалаларига оид қонун ҳужжатларини такомиллаштириш ҳамда ёшлар масалаларига оид қонунларнинг ижроси бўйича самарали ва таъсирчан парламент назоратини амалга ошириш юзасидан таклифлар ишлаб чиқишда муҳим институт эканлиги таъкидланди.

Мажлисда Қонунчилик палатасининг Ёшлар масалалари бўйича комиссиясини тузиш тўғрисида қарор қабул қилинди ва унинг таркиби тасдиқланди.