Яқин Шарқда вазият кескинлашгани муносабати билан Ўзбекистон ТИВ БААдаги фуқароларга мурожаат қилди

Тошкент, Ўзбекистон (UzDaily.uz) — Ўзбекистон Республикаси Ташқи ишлар вазирлиги мамлакатнинг Бирлашган Араб Амирликларидаги дипломатик ваколатхоналари билан ҳамкорликда Дубай ва БААнинг бошқа ҳудудларида бўлиб турган фуқароларга шошилинч мурожаат йўллади.

Яқин Шарқда вазиятнинг кескин кескинлашуви ва ҳаво ҳудудидан фойдаланишга қўйилган чекловлар сабабли Амирликлар билан авиақатнов вақтинча тўхтатилган.

Мурожаатда ўзбекистонликларнинг хавфсизлигини таъминлаш бўйича кучайтирилган чора-тадбирлар кўрилаётгани таъкидланган.

Фуқаролар тинчликни сақлашга ва белгиланган қоидаларга қатъий амал қилишга, жумладан, маҳаллий қонунчилик ҳамда расмий ҳокимият органлари кўрсатмаларига тўлиқ риоя этишга чақирилмоқда.

Шунингдек, ўта зарурат бўлмаган ҳолларда кўчага чиқмаслик, одамлар оммавий тўпланадиган жойлардан узоқроқ бўлиш, тасдиқланмаган миш-мишлардан қочиб, фақат расмий манбалардаги маълумотларга ишониш қатъий тавсия этилмоқда.

Фавқулодда ҳолатларда тезкор алоқа ўрнатиш ва ёрдам олиш учун қуйидаги телефон рақамлари очилган: +971 55 986 9040 ва +971 55 956 4110.

Ўзбекистон дипломатик корпуси БАА ҳудудида фуқароларни қўллаб-қувватлаш, ҳаракатларни мувофиқлаштириш ва ҳар томонлама ёрдам кўрсатиш мақсадида кучайтирилган тартибда фаолиятни давом эттирмоқда.