Яқин кунларда совуқ тушиши ва ҳаво ифлосланишининг вақтинчалик ошиши кутилмоқда

Тошкент, Ўзбекистон (UzDaily.uz) — Ўзбекистон Республикаси ҳудудига совуқ антициклон кириб келмоқда, унинг таъсири босқичма-босқич намоён бўлади. Бу ҳақда Ўзгидромет хабар қилди.

Антициклон кириб келиш даврида атмосферада ҳаво алмашинуви сусайиши кутилмоқда, бу эса ифлослантирувчи моддалар ҳамда майда заррачалар — PM2,5 ва PM10 тўпланишига олиб келиши мумкин. Натижада атмосфера ҳавосининг ифлосланиш кўрсаткичлари вақтинчалик ошиши эҳтимоли бор. Ушбу шароитлар уч кунгача сақланиб туриши мумкин.

Антициклон таъсири кучайиши билан 16–17 январь кунлари мамлакатнинг деярли барча ҳудудларида ҳаво ҳарорати пасайиши прогноз қилинмоқда.

Кундузги ҳароратнинг пасайиши тунги ва эрталабки соатларда совуқнинг янада кучайиши билан кузатилади.

Шу билан бирга, антициклон таъсири остида айрим ҳудудларда ёғингарчилик кутилмоқда. Айрим жойларда қисқа муддатли ёмғир ва қор ёғиши, шунингдек, шамол кучайиши мумкин.

Ушбу омиллар атмосферада тўпланган ифлослантирувчи моддалар ва майда заррачаларнинг тозаланишига хизмат қилиб, ҳаво сифатининг вақтинчалик яхшиланишига олиб келиши мумкин.