Тошкент, Ўзбекистон (UzDaily.uz) — 2025 йил 9 апрель куни Ўзбекистон Республикаси Инвестициялар, саноат ва савдо вазирлигида Япониянинг Sugi Holdings компанияси президенти Кацунори Сугиура билан учрашув бўлиб ўтди.

Учрашув чоғида компаниянинг йирик дорихона тармоқларини бошқаришдаги тажрибасини жалб этиш, профилактик тиббий дастурларни амалга ошириш, шунингдек, Япония тиббий маҳсулотларини Ўзбекистонга етказиб бериш масалалари муҳокама қилинди.

Кацунори Сугиура Ўзбекистонда ички талабни қондириш ва қўшни мамлакатларга экспорт қилиш мақсадида фармацевтика заводи қуриш лойиҳасини амалга оширишни ўз ичига олган стратегик ҳамкорликни ўрнатишга қизиқиш билдирди.

Томонлар муҳокама қилинган лойиҳаларни амалга ошириш юзасидан ҳамкорликни давом эттириш, шунингдек, Ўзбекистон Инвестициялар, саноат ва савдо вазирлиги томонидан алоҳида лойиҳа менеджерини тайинлаш юзасидан келишувга эришдилар.

Маълумот учун, Sugi Holdings 1976 йилда ташкил этилган бўлиб, фармацевтика ва тиббиёт соҳасидаги компаниялар гуруҳини бошқаради. Холдинг Японияда 2500 дан ортиқ дўкон ва 14 та йирик логистика марказини назорат қилади. Унинг акциялари Токио ва Осака фонд биржаларида сотилади.