Тошкент, Ўзбекистон (UzDaily.uz) —  Иқтисодиёт ва молия вазирлигида Япониянинг Sojitz компанияси билан Қўшма молиялаштириш механизми (Joint Crediting Mechanism – JCM) доирасида лойиҳаларни амалга ошириш бўйича музокаралар бўлиб ўтди.

Учрашувда Sojitz Corporation компаниясининг менежер ёрдамчиси Юсуке Мизуно, Бизнесни ривожлантириш бўйича менежери Акбаржон Акрамов ҳамда вазирликнинг Яшил иқтисодиётга ўтиш ва ривожлантиришни мувофиқлаштириш бошқармаси вакиллари иштирок этди.

Учрашувдан кўзланган асосий мақсад Sojitz Corporation томонидан Ўзбекистон Республикаси Иқтисодиёт ва молия вазирлиги ҳамда Энергетика вазирлиги билан биргаликда амалга оширилиши режалаштирилаётган лойиҳаларнинг жорий ҳолати ва истиқболларини атрофлича муҳокама қилиш бўлди.

Хорижий томон Ўзбекистонда қайта тикланувчи энергия манбаларидан фойдаланишни кенгайтириш ҳамда иссиқхона газлари эмиссиясини камайтиришга қаратилган лойиҳаларни JCM механизми доирасида амалга ошириш бўйича таклифни илгари сурди.

Шунингдек, вазирлик иссиқхона газлари эмиссиясини қисқартиришга қаратилган лойиҳаларни қўллаб-қувватлашга тайёрлигини ҳамда мазкур лойиҳалар JCM механизми доирасида ишлаб чиқилган тартиб-қоидалар асосида кўриб чиқилишини маълум қилди.

Учрашув сўнгида томонлар JCM механизми доирасидаги ҳамкорликни йўлга қўйиш ва муҳокамаларни давом эттиришга келишиб олди.