Тошкент, Ўзбекистон (UzDaily.uz) — Янги Тошкентда узунлиги 8 километр бўлган ва учта бекатдан иборат метро участкаси 2026 йил охирига қадар қурилиши режалаштирилгани ҳақида “Янги Тошкент” қурилиш дирекцияси маълум қилди.

Ушбу участок “Дўстлик” бекатини Янги Тошкент билан боғлайдиган тармоқнинг бир қисми бўлади. Дастлаб тўртта бекат қуриш мўлжалланган эди, аммо ҳозирги босқичда лойиҳа учта бекатни ўз ичига олади.

Қурилиш қиймати 110 миллион долларга баҳоланган. 2025 йилда 11 миллион доллар ўзлаштирилиши, қолган 99 миллион доллар эса 2026 йилда сарфланиши кўзда тутилган. Лойиҳа инвестори — қурилиш, саноат ва савдо соҳасида фаолият юритувчи туркиялик XVAV YAPI SANAYI VE TIC. A.S. компанияси.

Транспорт вазири Илҳом Маҳкамовнинг айтишича, пойтахт билан Янги Тошкент ўртасида метро қуриш ташаббуси мамлакат президенти томонидан янги шаҳарнинг транспорт инфратузилмасини ривожлантириш доирасида таклиф қилинган.

Июнь ойида аниқланишича, “Дўстлик”дан Янги Тошкентгача бўлган бутун метро тармоғи узунлиги 21 километрни ташкил этиб, тўққизта бекатни ўз ичига олади. Тахминий ҳисоб-китобларга кўра, у кунига 230 минггача йўловчи ташиш имкониятига эга бўлади.