Тошкент, Ўзбекистон (UzDaily.uz) — Yandex Uzbekistan Yandex ML School’га қабул жараёнини бошлади — мамлакатдаги илк марказ, юқори даражадаги сунъий интеллект мутахассисларини тайёрлашга йўналтирилган: машинани ўрганиш, математика ва маълумотлар таҳлили бўйича. Қатнашиш учун дастлаб кириш тестини топшириш талаб этилади. Муваффақиятли номзодлар сентябрнинг иккинчи ярмида Тошкентда бўлиб ўтадиган шахсий суҳбатга таклиф этилади. Барча саралаш босқичларидан ўтганлар октябрда ўқишни бошлайдилар. Дастур тўлиқ бепул.

Таълим оффлайн форматда Тошкентда ўтказилиб, икки семестрлик интенсив тайёргарликни ўз ичига олади. Дастур фундаментал ёндашув асосида ишлаб чиқилган бўлиб, уни Машина ўрганиш бўйича етакчи ўқув марказларидан бири — Yandex’нинг “Маълумотларни таҳлиллаш мактаби” (МТМ) мутахассислари тайёрлаган. Унда чуқур назарий билим ва амалий кўникмалар уйғунлашган. Ўқитувчилар орасида Yandex экспертлари, Ўзбекистоннинг етакчи университетлари профессорлари ва ML соҳасидаги тажрибали мутахассислар бор.

"Мамлакат раҳбарияти инсон капитали ривожига алоҳида эътибор қаратмоқда. Сифатли таълим жиддий инвестиция талаб этади, шу боис компаниялар томонидан молиялаштирилаётган таълим ташаббуслари мамлакатнинг барқарор ривожланиши учун айни муддао. Yandex ML School Uzbekistan каби бепул ўқув марказларининг пайдо бўлиши сифатли билимларга етарлича кириш имконини кенгайтиради, иқтидорли ёшларга ўзини намоён қилишга ёрдам беради ва рақобатбардош иқтисодиётни шакллантиришга ҳисса қўшади. Бошқа компанияларни ҳам ёшларимиз малакасини оширишга кўпроқ инвестиция киритишга чақириб қоламиз", — деди Ўзбекистон рақамли технологиялар вазири Шерзод Шерматов.

Yandex ML School таълим тизими математика, машинани ўрганиш, статистика ва алгоритмлар асосига қурилган. Дастур амалиётга йўналтирилган: талабалар тармоқдан олинган ҳақиқий масалаларни ечадилар, катта ҳажмли уй вазифаларини бажарадилар, ўқитувчилардан мунтазам фикр-мулоҳаза оладилар, амалий воркшоплар ва индустриал уикендларда иштирок этадилар. Дарслар инглиз тилида олиб борилади, бу эса халқаро даражадаги касбий материалларга йўл очади ва битирувчиларнинг жаҳон меҳнат бозорида рақобатбардошлигини оширади. Ҳафталик юклама 20–30 соатни ташкил қилади: машғулотлар кечқурун ўтказилади, қолган вақт мустақил ишга ажратилади.

Yandex ML School ҳар йили senior даражасидаги мутахассисларни тайёрлайди, долзарб вазифаларни ечиш, технологик маҳсулотлар яратиш ва жаҳон миқёсидаги ечимларни мамлакат иқтисодиётига жорий қилиш қобилиятига эга профессионаллар жамоасини шакллантиради.

Yandex ML School’нинг йўлга қўйилиши компаниянинг Ўзбекистонда технологиялар соҳасида таълимни ривожлантириш стратегиясини давом эттиради. Бу стратегия мактаб ўқувчиларидан тортиб, информатика ўқитувчилари учун курслар ва мутахассислар учун интенсив дастурларини қамраб олади.

Аризалар 10 сентябрга қадар қабул қилинади.