Тошкент, Ўзбекистон (UzDaily.uz) — Интернетда "Абу Валид" номи билан танилган Худоёр Нуриддиновга қарши Ўзбекистонда жиноий иш қўзғатилди.

1994 йилда Фарғона вилояти Риштон туманида туғилган. 2016 йилда меҳнат мигранти сифатида Россияга чиқиб кетган. У ерда халқаро террорчилик ташкилотлари ғоялари таъсирига тушган ва кейинроқ Суриянинг Идлиб шаҳрига кўчиб ўтган.

Сурияда Нуриддинов ташвиқот ишлари билан шуғулланган, бу эса баъзи ўзбекистонликларни қуролли можароларда қатнашишга жалб қилган ва уларнинг ҳалок бўлишига сабаб бўлган.

Ҳозирги вақтда Нуриддинов ижтимоий тармоқлар ва YouTube платформаси орқали экстремистик ғояларни тарқатиш ва жиҳодга чақирувлар билан боғлиқ жиноий фаолиятини давом эттирмоқда. У тарқатаётган материаллар ЎзбекистонA ҳудудида тақиқланган. Унинг видеоларини сақлаш, томоша қилиш ва тарқатиш жиноий жавобгарликка олиб келиши мумкин.

Ўзбекистон Давлат хавфсизлик хизмати томонидан Худоёр Нуриддиновга қарши Жиноят кодексининг бир қатор моддалари бўйича жиноий иш қўзғатилган:

155-2-модда: Террорчилик фаолияти, шу жумладан, ўқотар қуролдан фойдаланиш ва можаро ҳудудларига сафар қилиш.

159-модда: Ўзбекистон Республикасининг конституциявий тузумига тажовуз.

223-модда: Давлат чегарасини ноқонуний кесиб ўтиш, Ўзбекистон Республикаси ҳудудига ноқонуний кириш ёки чиқиш.

244-2-модда: Диний экстремистик, сепаратистик ва фундаменталистик ташкилотлар фаолиятини яратиш, уларга раҳбарлик қилиш ва қатнашиш.

Худоёр Нуриддинов қидирувга берилган бўлиб, мазкур иш бўйича тергов ишлари давом этмоқда.