Тошкент, Ўзбекистон (UzDaily.uz) — Мажлисда депутатлар “Давлат ижтимоий суғуртаси тўғрисида”ги қонун лойиҳасини иккинчи ўқишда моддама-модда муҳокама қилдилар.

Таъкидланганидек, янги таҳрирдаги Конституциямизда ҳар ким меҳнат қобилиятини йўқотганида ҳамда ишсизлигида ижтимоий таъминот ҳуқуқига эга эканлиги белгиланган. Бироқ, бугунги кунда ходимлар вақтинча меҳнат қобилиятини йўқотганида ёки ишдан бўшатилганда ижтимоий қўллаб-қувватлашда бир қатор муаммоларга дуч келмоқда.

Жумладан, ҳомиладорлик ва туғиш ҳамда вақтинча меҳнатга лаёқатсизлик нафақалари иш берувчилар учун ортиқча молиявий юклама бўлганлиги сабабли, ушбу нафақаларни хусусий секторда тўламаслик ёки ҳомиладорларни ишга олмаслик, уларни ишдан бўшатиш ҳолатлари кузатилмоқда.

Юқоридаги ҳолатларнинг олдини олиш мақсадида қонун лойиҳаси билан бир қатор муҳим нормалар белгиланмоқда. Яъни, лойиҳада давлат ижтимоий суғуртаси тизими ва давлат ижтимоий суғуртаси тўловларини тўлаш соҳасидаги муносабатларни тартибга солиш, касаллик туфайли вақтинча меҳнатга лаёқатсизлик, ҳомиладорлик ва туғиш ҳамда иш ёки даромадни йўқотиш билан боғлиқ ҳолатларда тўланадиган вақтинча меҳнатга лаёқатсизлик нафақаси, ҳомиладорлик ва туғиш нафақаси ва ишдан бўшатилганлик нафақаси давлат ижтимоий суғуртаси билан амалга оширилиши назарда тутилмоқда.

Шунингдек, давлат ижтимоий суғуртаси бўйича суғурта ҳодисалари рўй берганда тегишли тўловларни тайинлаш ва тўлаш тартиби, давлат ижтимоий суғуртаси бўйича тўловларни тўхтатиб туриш, қайта тиклаш ва тугатиш асослари белгиланмоқда.

Депутатларнинг таъкидлашича, ушбу қонун лойиҳасининг қабул қилиниши фаолият туридан қатъи назар ишлаётган ходимларга вақтинчалик меҳнатга лаёқатсизлик нафақаси, хомиладорлик ва туғиш нафақаси ҳамда ишдан бўшатиш нафақасини тўлиқ тўланишига, ижтимоий фаол аҳолининг камбағал оилалар тоифасига тушиб қолишининг олдини олишга хизмат қилади.

Мажлисда қонун лойиҳаси депутатлар томонидан учинчи ўқишда қабул қилинди ваСенатга юборилди.