Тошкент, Ўзбекистон (UzDaily.uz) — Сирдарё вилояти ҳокими вазифасини бажарувчи Эркинжон Турдимов Хитой Халқ Республикасининг Шинжон-Уйғур автоном райони халқ ҳукумати котибияти раҳбари ўринбосари Чжан Цзиньпин бошчилигидаги делегация билан учрашув ўтказди.

Учрашувда икки томонлама ҳамкорликни ривожлантириш, қўшма лойиҳаларни амалга ошириш ва дўстона муносабатларни янада мустаҳкамлаш масалалари муҳокама қилинди.

Э.Турдимов Сирдарё вилоятида қишлоқ хўжалигида юқори самарадорликка эришилаётганини, саноат ва қайта ишлаш соҳаларида катта имкониятлар мавжудлигини таъкидлади. Шу билан бирга, икки мамлакат тадбиркорлари иштирокида амалга оширилаётган қўшма лойиҳаларнинг икки томон учун ҳам манфаатли эканлигини қайд этди.

Ўз навбатида Чжан Цзиньпин Сирдарё вилоятида қўлга киритилаётган ютуқлар, хусусан пахтачилик ва қишлоқ хўжалигидаги ижобий натижаларни юқори баҳолади. У ШУАР тадбиркорлари Ўзбекистон билан, айниқса Сирдарё вилояти билан қишлоқ хўжалиги, саноат ва логистика соҳаларида ҳамкорликни кенгайтиришдан манфаатдор эканини билдирди.

Мулоқот самимий ва дўстона руҳда ўтиб, икки томон биргаликда амалга ошириладиган янги қўшма лойиҳалар юзасидан келишиб олдилар.