Тошкент, Ўзбекистон (UzDaily.uz) — Инвестициялар, саноат ва савдо вазири ўринбосари Илзат Касимов “Xinjiang New Vision Investment Development Company” бошқаруви раиси Ван Чжиёнг ва Envision Energy компанияси раҳбари Чжан Хуан билан музокаралар ўтказди.

Учрашувда Самарқанд вилоятида 300 гектар майдонда йирик илмий-технологик саноат парки барпо этиш лойиҳаси муҳокама қилинди. Ушбу парк доирасида илмий-тадқиқот ва логистика зоналарини ташкил этиш, шунингдек, турли соҳаларда 12 та йирик инвестисия лойиҳасини амалга ошириш режалаштирилган.

Ушбу ташаббус инновацион технологиялар алмашинувини фаоллаштириш, юқори қўшимча қийматга эга маҳсулотлар ишлаб чиқариш ҳамда Ўзбекистон ва Хитой ўртасидаги сармоявий ҳамкорликни янада кенгайтириш учун мустаҳкам замин яратади.

Xinjiang New Vision Investment Development Company Урумчи иқтисодий ва технологик ривожланиш зонасида жойлашган. Стратегик инвестиция лойиҳаларини амалга ошириш ва ишлаб чиқариш зоналарини бошқаришда катта тажрибага эга.