Тошкент, Ўзбекистон (UzDaily.uz) — Транспорт вазирининг ўринбосари Илхомжон Абдуғафуров Хитой Экспорт-импорт банкининг эркин савдо ва имтиёзли кредитлаш департаменти раҳбари Мо Го билан учрашув ўтказди.

Музокараларда Тошкент шаҳри транспорт ва йўл-транспорт инфратузилмасини ривожлантириш бўйича Бош бошқарма ҳамда “Тошшахартрансхизмат” акциядорлик жамияти вакиллари ҳам иштирок этдилар.

Суҳбат марказида Тошкент шаҳри жамоат транспорти эҳтиёжлари учун 200 та электробус харид қилиш лойиҳасини амалга ошириш мақсадида Хитой Халқ Республикаси Эксимбанки томонидан молиялаштириш масалалари муҳокама қилинди.

Мазкур лойиҳа “Ўзбекистон – 2030” Стратегиясини амалга ошириш бўйича Давлат дастури ва “Атроф-муҳитни муҳофаза қилиш ва яшил иқтисодиётни ривожлантириш йили” доирасида амалга оширилаётган бўлиб, у иқлим ўзгаришларига мослашиш, углероддан холис ечимларни илгари суриш ва “яшил” лойиҳаларни ривожлантиришга қаратилган. Бу масалалар Ўзбекистон Республикаси Президенти ва Вазирлар Маҳкамасининг тегишли қарорларида ҳам ўз ифодасини топган.

Учрашув доирасида Нукус шаҳри ва вилоятлар маъмурий марказлари учун сиқилган табиий газда ҳаракатланадиган 1000 та йирик автобусларни жадал тарзда харид қилиш масалалари ҳам кўриб чиқилди.

Музокаралар якунларига кўра, томонлар қўшма лойиҳалар доирасида ҳамкорликни чуқурлаштириш бўйича кейинги қадамларни белгилаб олдилар.