Тошкент, Ўзбекистон (UzDaily.uz) — 2024 йил якунларига кўра, Wildberries онлайн-маркетплейс орқали ўзбек маҳсулотлари савдоси ўтган йилга нисбатан 61,3% га ўсди, деб хабар берди платформа матбуот хизмати.

Россия бозорида ўзбек озиқ-овқат маҳсулотлари савдоси икки бараварга ошгани кузатилди. Шунингдек, уй учун текстиль маҳсулотлари савдоси 66% га, кийим-кечак 61% га, спорт кийимлари эса 51% га ўсган.

Беларусда Ўзбекистонда ишлаб чиқарилган автомобиль товарлари савдоси беш бараварга кўпайди. Шунингдек, озиқ-овқат маҳсулотлари, болалар учун товарлар, кийим-кечак ва ўйинчоқларга талаб икки бараварга ошгани қайд этилди.

Қозоғистон бозорида эса автомобиль товарлари ва кийим-кечак савдоси етакчи ўринни эгаллади. Спорт кийимлари (+78%), уй учун текстиль (+71%) ва болалар кийимлари (+59%) савдосида катта ўсиш қайд этилди.

Қирғизистонда автомобиль товарлари савдоси 15 бараварга ошди, шунингдек, кийим-кечак ва уй учун текстиль маҳсулотлари савдоси бир неча бараварга кўпайди.

Wildberries маълумотларига кўра, текстиль Ўзбекистон экспортида етакчи тоифа бўлиб қолмоқда. Шу билан бирга, автомобиль товарлари ва озиқ-овқат маҳсулотлари савдосининг ўсиши экспорт ассортиментининг диверсификацияланиши ва халқаро талабларга мослашуви ҳақида гувоҳлик беради, деб таъкидланди компанияда.