Витебскда Ўзбекистон ва Беларусь парламентлараро комиссиясининг биринчи мажлиси бўлиб ўтди

Тошкент, Ўзбекистон (UzDaily.uz) — Витебск шаҳрида Ўзбекистон Республикаси Олий Мажлиси Сенати ва Беларусь Республикаси Миллий мажлиси Республика Кенгаши ҳамкорлик бўйича парламентлараро комиссиясининг биринчи мажлиси бўлиб ўтди.

Мажлисда парламентлараро алоқаларни мустаҳкамлашнинг долзарб масалалари муҳокама қилинди, биргаликдаги ишларнинг устувор йўналишлари келишиб олинди ва ҳамкорликнинг янги формати истиқболлари баҳоланди.

Томонлар Парламентлараро комиссиянинг ташкил этилиши Ўзбекистон-Беларусь муносабатларини ривожлантиришда муҳим қадам бўлганини таъкидлади. Янги механизм сиёсий, иқтисодий, ижтимоий ва гуманитар соҳаларда тизимли мулоқотни йўлга қўйиш, ташаббусларни мувофиқлаштириш ва узоқ муддатли ҳамкорлик дастурларини ишлаб чиқиш имконини беради.

Ҳудудлараро ҳамкорликни ривожлантириш ва маҳаллий вакиллик органлари ўртасидаги алоқаларни мустаҳкамлашга алоҳида урғу берилди. Парламент аъзолари таълим, маданият, соғлиқни сақлаш, туризм ва ижтимоий сиёсат соҳаларида фаол тажриба алмашиш ва лойиҳаларни биргаликда амалга ошириш орқали ҳудудлар ҳамкорликнинг драйверига айланиши мумкинлигини таъкидлади.

Ўзбекистон ва Беларусь тадбиркор аёлларининг учинчи бизнес-форуми бўлиб ўтгани, унинг доирасида туризм, таълим, соғлиқни сақлаш, енгил саноат, машинасозлик ва бошқа муҳим йўналишлар бўйича секция йиғилишлари ўтказилгани юқори баҳоланди. Форум ишбилармон доираларнинг амалий ҳамкорликдан манфаатдорлигини тасдиқлади.

Шунингдек, икки мамлакат ёшлар парламентлари ўртасида фаол ҳамкорлик зарурлиги таъкидланди, бу эса ёш авлодга қонун ижодкорлигида иштирок этиш, тажриба алмашиш ва дўстона алоқаларни мустаҳкамлаш имконини беради.

Мажлис якунлари бўйича парламентлараро мулоқотни чуқурлаштириш, минтақавий алоқаларни ривожлантириш, жамоатчилик ташаббусларини қўллаб-қувватлаш ва ёшларни ушбу жараёнга жалб этишга қаратилган қўшма механизм ва дастурларни ишлаб чиқишга келишиб олинди. Комиссия фаолияти Ўзбекистон ва Беларусь ўртасидаги ҳар томонлама шерикликни мустаҳкамлашда муҳим воситага айланиши таъкидланди.