Велоспорт: Ўзбекистон терма жамоаси Осиё чемпионатида навбатдаги медални қўлга киритди

Тошкент, Ўзбекистон (UzDaily.uz) — Саудия Арабистонида ўтаётган шоссей велоспорт бўйича Осиё чемпионатида Ўзбекистон терма жамоаси ўз медаллар жамғармасини яна бир мукофот билан тўлдирди.

Аёллар ўртасидаги гуруҳ пойгада кумуш медални Нафосат Қозиева қўлга киритди. 109,2 километр масофада ўзбекистонлик спортчи иккинчи бўлиб маррага етиб келди ва юқори даражадаги жисмоний тайёргарлик ҳамда тактик курашни намоён этди.

Совринли ўринларга жуда яқин бўлган яна бир Ўзбекистон вакили Янина Кускова тўртинчи ўринни эгаллади.

Миллий терма жамоанинг ушбу натижалари ўзбек велоспортининг халқаро майдонда рақобатбардошлиги барқарор ошиб бораётганини тасдиқлайди.