Тошкент, Ўзбекистон (UzDaily.uz) — Uzum сервисларидан 16 миллиондан ортиқ Ўзбекистонлик фойдаланмоқда, деб хабар беради финтех матбуот хизмати.

Uzum Bank 700 мингдан ортиқ Uzum карталарини чиқарди, уларда мижозлар микрокредитлар ёки ҳамкорлар дўконларида бўлиб-бўлиб тўлаш имкониятига эга. 2024 йилда берилган бўлиб-бўлиб тўлов ва микрозаймлар ҳажми ўтган йилга нисбатан 2,7 баробарга ошиб, $421 миллионни ташкил этди.

Умумий e-commerce сегментининг айланмаси (GMV) йиллик ҳисобда 2,4 марта ўсди. Uzum Market маркетплейсида буюртмалар сони икки баробар ошиб, 19 миллионга етди. Шунингдек, барча буюртмаларнинг тахминан 60%и ҳудудларга тўғри келмоқда.

Маркетплейс логистика инфратузилмасини фаол ривожлантирмоқда. Куз фаслида Марказий Осиёдаги энг йирик логистика мажмуаси ишга туширилди. Uzum Market’нинг топшириқ пунктлари сони уч баравар ошиб, тахминан 1000 тага етди.

Платформа орқали 14 000 ўзбекистонлик тадбиркор ўз маҳсулотларини сотмоқда.

Uzum Tezkor ҳудудларда кенгайишда давом этмоқда — бу хизмат ҳозирда мамлакатнинг 18 та шаҳрида мавжуд бўлиб, Uzum Tezkor’да буюртмалар сони ўтган йилга нисбатан 6 мартадан кўпроқ ошди.