Uzum финтех йўналишларини кенгайтириш учун Америка фондидан 300 млрд сўм инвестиция жалб қилди

Тошкент, Ўзбекистон (UzDaily.uz) — Uzum Fintech компанияси 300 млрд сўм миқдорида маблағ жалб қилганини маълум қилди, бу тахминан 25 млн АҚШ долларига тенг.

Маблағни ривожланаётган бозорларда фаолият юритувчи энг йирик халқаро инвесторлардан бири — АҚШдаги VR Capital фонди тақдим этди. Бу фонднинг Uzum’га иккинчи маротаба киритган инвестицияси бўлиб, Ўзбекистон рақамли иқтисодиёти ривожига бўлган ишончнинг муҳим белгиси сифатида баҳоланмоқда.

Компания таъкидланишича, жалб қилинган маблағлар компаниянинг асосий финтех-йўналишлари — рақамли банкинг, тўлов инфратузилмаси ва истеъмол кредитлашини янада тез ривожлантириш имконини беради.

Uzum дастурли равишда маҳаллий инфратузилмага таяниб, миллионлаб фойдаланувчилар учун қулай ва кенг қамровли молиявий хизматларни ривожлантиришда давом этишини билдирмоқда.

Айниқса, инвестициянинг миллий валютада жалб қилингани муҳим аҳамиятга эга. Бу сўмнинг халқаро ҳисоб-китоблардаги ролини мустаҳкамлайди ва мамлакатда корпоратив молиялаштириш барқарорлигини оширишга ҳисса қўшади.

Компания маълумотларига кўра, бугунги кунда Uzum экотизими хизматларидан 20 млн га яқин Ўзбекистон аҳолиси фойдаланмоқда.

Компания ўз навбатида мамлакатнинг энг йирик рақамли платформасини янада ривожлантириш ва иқтисодиётнинг рақамли трансформациясига кўмаклашиш ниятида эканини таъкидламоқда.