Тошкент, Ўзбекистон (UzDaily.uz) — Бугун Термиз аэропортига (TMJ) йўл олган икки йўловчи рейси қўйин туман сабабли захира аэродромларига қўнишга мажбур бўлди.

Биринчиси, HY-9610 Москва (VKO) – Термиз (TMJ) рейси бўлиб, Uzbekistan Airways авиакомпанияси томонидан Airbus A320-251NEO (UK32028) ҳаво кемасида амалга оширилган. Термиз аэропортида кўриш масофаси 100 метрни ташкил этганлиги сабабли қўниш хавфли деб топилди. Экипаж йўловчилар хавфсизлигини таъминлаш мақсадида Қарши (KSQ) халқаро аэропортига қўниш ҳақида қарор қабул қилди.

Иккинчиси, 9S2406 Жидда (JED) – Термиз (TMJ) рейси бўлиб, Air Samarkand авиакомпанияси томонидан Airbus A321-251NEO (UK32121) ҳаво кемасида амалга оширилган. Термизда кўриш масофаси 50 метр бўлганлиги сабабли, бу рейс ҳам ўз йўналишини ўзгартиришга мажбур бўлди ва Самарқанд (SKD) халқаро аэропортига қўнди.

Ҳар икки рейс йўловчилари Қарши ва Самарқанд аэропортларида зарур ёрдам ва қулайликлар билан таъминланди.

Йўловчиларни Термизга етказиш бўйича кейинги режалар ҳақида авиакомпаниялар томонидан қўшимча маълумот тақдим этилади. Ушбу ҳолат ноқулай об-ҳаво шароитида захира аэродромлар мавжудлиги ва экипажларнинг профессионаллигининг аҳамиятини яна бир бор тасдиқлади.