Тошкент, Ўзбекистон (UzDaily.uz) — Uzbekistan Airways авиакомпаниясининг Бухородан Москвага учаётган самолёти “Внуково” аэропортига яқинлашаётганда двигателида муаммо юзага келди

Авиакомпания экипажи томонидан тегишли процедуралар бажарилди ва самолётни белгиланган аэропортга қўндиришга қарор қилинди.

Авиакомпания матбуот хизмати хабарига кўра, ҳодиса 15 январь куни HY9607 рейси бўйича содир бўлган. Бортида 132 йўловчи бўлган Airbus A320 самолёти экипажнинг профессионал ҳаракатлари туфайли эсон-омон қўнди.

Uzbekistan Airways техник хизматлари томонидан барча тиклаш ишлари олиб борилмоқда. Амалдаги парвозлар жадвалида режалаштирилган кейинги авиақатновлар Внуково халқаро аэропортига учиб кетган захира ҳаво кемасида амалга оширилади.

Авиакомпания юзага келган ноқулайликлар ва ушбу ҳаво кемасида илгари режалаштирилган авиақатновларнинг кечикиши учун йўловчилардан узр сўради.