Uzbekistan Airways кузатув кенгаши таркибини янгилади

Тошкент, Ўзбекистон (UzDaily.uz) — Миллий авиакомпания Uzbekistan Airways кузатув кенгаши таркибида ўзгаришлар амалга оширилди, деб хабар бермоқда Корпоратив ахборотнинг ягона портали. Кузатув кенгашини қисман янгилаш тўғрисидаги қарор ягона акциядор ҳисобланган Иқтисодиёт ва молия вазирлиги томонидан қабул қилинди.

Кузатув кенгаши таркибидан уч нафар аъзо чиқарилди: Infrasia Capital компанияси директори ва собиқ молия вазири Одилбек Исаков; транспорт вазири ўринбосари Жасурбек Чориев; Иқтисодиёт ва молия вазирлигининг уй-жой коммунал хўжалиги, транспорт ва алоқа соҳаларида молиявий тартибга солиш ва нарх сиёсати департаменти раҳбари Зафар Астанов.

Кенгаш таркибига икки нафар янги аъзо киритилди: Franklin Templeton компаниясининг катта инвестиция менеджери Павел Мхитарян ҳамда Президент Администрациясида координатор лавозимида фаолият юритувчи Отабек Унгбаев.

Мхитарян 24 февраль куни LinkedIn саҳифасида Uzbekistan Airways кузатув кенгаши таркибига Ўзбекистон Миллий инвестиция жамғармаси мандати доирасида киритилганини маълум қилди.

Президент Шавкат Мирзиёев 25 февраль куни давлат компанияларини бошқариш тизимини қайта ташкил этиш тўғрисида қарорни тасдиқлади. Ҳужжатга мувофиқ, Ўзбекистон Миллий инвестиция жамғармаси акцияларига эгалик қиладиган компанияларнинг кузатув кенгашлари таркибига Franklin Templeton Asset Management вакиллари киритилади.

Йил охирига қадар жамғарма акцияларини IPO орқали жойлаштириш режалаштирилган.