Тошкент, Ўзбекистон (UzDaily.uz) — Uzbekistan Airways авиакомпанияси 20 январдан бошлаб Европага амалга ошириладиган рейсларнинг йўналишларини ўзгартирди ва Россия ҳудуди устидан парвозларни тўхтатди. Бу ҳақда авиакомпания бошқаруви раиси Шухрат Хўжақулов маълум қилди.

Қарор Европа авиация хавфсизлиги агентлиги (EASA) ҳисоботи асосида қабул қилинди. Ҳисоботда Россиянинг Европа қисми устидаги парвозлар хавфли деб белгиланган. Янги йўналишлар жануб томон — Озарбайжон ва Туркия орқали ўтади.

Хўжақуловнинг айтишича, йўналишларнинг ўзгариши рейсларнинг давомийлигини 30–40 дақиқага узайтиради ва авиакомпания харажатларини оширади. Бироқ, мазкур ҳолат фавқулодда бўлгани сабабли, йўловчилар учун тарифлар оширилмади.

Uzbekistan Airways ҳаво ҳудудининг хавфсизлигини доимий назорат қилиб боради. Авиакомпания раҳбарининг таъкидлашича, парвозларни бошқариш маркази маълумотларни реал вақт режимида таҳлил қилади. Агар йўналиш хавфли деб топилса, уни ўзгартириш бўйича тезкор қарор қабул қилинади.

Аввалроқ, Қозоғистонда Azerbaijan Airlines самолёти ҳалокати ортидан вазиятни таҳлил қилиш мақсадида Ўзбекистонда бош вазир раҳбарлигида махсус комиссия тузилган эди. Комиссия таркибига Мудофаа вазирлиги, Транспорт вазирлиги, Ўзаваиация ва бошқа ташкилотлар вакиллари киритилган.

Шухрат Хўжақулов таъкидлашича, компаниянинг барча рейслари хавфсизликнинг максимал чораларига амал қилган ҳолда бажарилмоқда. Ҳозирда Украина, Россиянинг Европа қисми ва Осиёнинг айрим тоғли ҳудудлари об-ҳаво шароити туфайли хавфли ҳудудлар деб ҳисобланади.

Шунингдек, барча йўналишлар учун хавфсизликни таъминлаш мақсадида альтернатив ёки захира йўллари ишлаб чиқилган.