UzAuto Motors янги Damas ва Cobalt моделларини ишлаб чиқаришни йўлга қўяди

Тошкент, Ўзбекистон (UzDaily.uz) — “UzAuto Motors” АЖ автомобиль моделлари қаторини кенгайтириш ҳамда мавжуд моделларни модернизация қилиш бўйича стратегик дастурни фаол амалга оширмоқда. Ўзбекистон Республикаси Президентининг жорий йил май ойида Хоразм вилоятига ташрифи давомида берилган устувор вазифалар қаторида “Хоразм Авто” корхонасида янги моделларнинг ишлаб чиқарилишини йўлга қўйиш, ишлаб чиқариш қувватларини модернизация қилиш ва кенгайтириш белгиланган.

Ташкил қилинаётган ишлаб чиқариш қувватларида кичик бизнес ва хусусий мижозларнинг талаб ва истакларини инобатга олган ҳолда Damas арзон минивенлари янги версиясининг ишлаб чиқарилиши йўлга қўйилади. Янги Damas ихчам, тежамкор ва сиғимдор автомобиль бўлиб, у шаҳар ичидаги кундалик ҳаракатлар учун ҳам, тижорий фаолиятда фойдаланиш учун ҳам жуда қулайдир.

Фарқли хусусиятларига ўлчамларнинг катталашгани, юк кўтариш қобилияти ва сиғимнинг ошгани, шунингдек ҳайдовчи ҳамда йўловчилар қулайлигининг сезиларли даражада яхшиланганидир. Модель Damas Move йўловчи версиясида ва Damas Max юк-йўловчи версиясида мавжуд бўлади.

Янги модель айни пайтдаги жорий Дамас версияси билан бир вақтда ишлаб чиқарилади, бу эса харидорларга синовдан ўтган классик модель ҳамда замонавий технологик янгиликларга эга янги авлод автомобили ўртасида эркин танлов қилиш имконини яратади.

UzAuto Motors модель қаторини кенгайтириш билан бир вақтда, энг кўп талаб этиладиган моделларидан бири Chevrolet Cobalt'ни кенг кўламли модернизация қилди. Ҳозирда мавжуд комлектацияларига қўшимча равишда мижозларга иккита янги Cobalt Style MCM ва Cobalt Midnight MCM версиялари тақдим этилади.

Уларнинг ҳар бири кенгайтирилган опциялар тўплами, замонавий технологиялар, яхшиланган комфорт ва юқори хавфсизлик даражаси билан ажралиб туради.