«UzAuto Motors» Chevrolet Cobalt сотилиши тартибини тушунтирди ва коррупция ҳақидаги миш-мишларни рад этди

Тошкент, Ўзбекистон (UzDaily.uz) — Жорий йилнинг 3 ноябрида «UzAuto Motors» 100 минг дона Chevrolet Cobalt автомобилларини сотувга қўйди. Шартнома шартларига мувофиқ, етти кун мобайнида тўлов амалга оширилмаган контрактлар бекор қилинди. Якунда 20 833 та автомобиль учун тўлов амалга оширилди.

Онлайн-контрактлар якунлангач, автомобил сотиб олишга улгурмаган фуқаролардан компанияга кўплаб мурожаатлар тушди. Шунингдек, 3 ноябр куни расмийлаштирилган контрактларнинг катта қисми автомобиль сотиб олишга ҳақиқий эҳтиёжсиз тузилгани маълум бўлди. Шу муносабат билан тўлов муддати якунланганидан сўнг компания Chevrolet Cobalt’ни дилерлик марказлари орқали сотишни бошлашга қарор қилди.

Эндиликда онлайн тизим орқали автомобиль расмийлаштира олмаган ҳар қандай мижоз Chevrolet’нинг исталган расмий дилери орқали автомобиль сотиб олиши мумкин. Хараидорлар ўзлари танлаган дилерлик марказини, омборда мавжуд автомобилни танлаб, кафолат шартлари сақланган ҳолда қўшимча жиҳозлар ўрнатиш имконига эга.

Дилерлик тармоғи орқали сотилаётган барча автомобиллар «UzAuto Motors»нинг ягона тизими орқали расмийлаштирилади. Ҳар бир шартномада унинг ҳақиқийлигини тасдиқловчи QR-код мавжуд.

2025 йил 20 ноябрь ҳолатига кўра дилерлик марказларига 2 624 дона Chevrolet Cobalt юборилган, шулардан 1 969 таси аллақачон сотилиб, мижозларга топширилган. Кўрсаткичлар ҳар куни ортиб бормоқда. Йўлда дилерларга етказилаётган яна тахминан 6 000 та автомобиль мавжуд. Компания таъкидлаишча, дилерлик тармоғи орқали амалга оширилаётган савдолар онлайн орқали сотиб олинган автомобиллар бўйича мажбуриятларни бажаришга таъсир қилмайди.

20 ноябрь ҳолатига кўра ноябрь ойи учун белгиланган автомобилларнинг ярмидан кўпи мижозларга топширилди. 15 декабрга қадар 2025 йил декабрь ва 2026 йил январь ойларида етказиб берилиши кўзда тутилган автомобилларни тўлиқ тайёрлаб қўйиш режалаштирилган. Шу тариқа, «UzAuto Motors» ўз мажбуриятларини жадвалдан олдин бажармоқда.

Компания ижтимоий тармоқларда Chevrolet Cobalt сотилишидаги эҳтимолий коррупцион схемалар ҳақида тарқалган хабарларга ҳам изоҳ берди. «UzAuto Motors» коррупцияга нисбатан мутлақ тоқатсизлик сиёсатига амал қилишини таъкидлади ва дилерлик марказларида ҳар қандай ноқонуний ҳаракат ёки пул талаб қилиш ҳолатлари юз берганда дарҳол Комплаенс департаментига мурожаат қилишга чақирди.

Олиб борилган текширув натижасида мазкур хабар муаллифи томонидан ҳеч қандай далил келтирилмагани аниқланди. Компания бундай асоссиз даъволар ишлаб чиқарувчи ва расмий дилерлар шаънига путур етказишини таъкидлаб, текширилмаган маълумотни тарқатмасликка чақирди.

«UzAuto Motors» мижозлар ҳуқуқлари бузилиши билан боғлиқ барча мурожаатларни кўриб чиқишга ва конструктив мулоқотга тайёрлигини билдирди.