Тошкент, Ўзбекистон (UzDaily.uz) — Украина Президенти Владимир Зеленский Россия, Беларусь, Ўзбекистон, Хитой ва Эрондан бўлган 58 нафар жисмоний ва 74 та юридик шахсга қарши санкциялар жорий этиш ҳақидаги фармонни имзолади, деб хабар бермоқда Украина оммавий ахборот воситалари.

10 йил муддатга жорий қилинган санкциялар машинасозлик, кимё, металлургия ва авиация саноати, шунингдек электрон техника дистрибуцияси соҳаларида фаолият юритаётган корхоналарга тааллуқли.

Ушбу рўйхатга Ўзбекистондан учта компания — Mercury Renaissance, Raw Materials Cellulose ва Фарғона кимё заводи (Farg‘ona Kimyo Zavodi) киритилган. Ушбу корхоналар пахта целлюлозаси ишлаб чиқариш соҳасида ихтисослашган.

Mercury Renaissance ва унинг дочер компанияси Farg‘ona Kimyo Zavodiнинг улушлари Рустам Раҳимжанович Муминов (60%) ва Шаҳриёр Сахиёрович Тожиев (40%)га тегишли. Raw Materials Cellulose эса Лариса Михайловна Уткина (76%) ва Лариса Раҳимжонова Быкова (24%)га тегишли экани қайд этилган.

Рустам Муминов ҳам жисмоний шахс сифатида санкциялар қўлланган шахслар рўйхатига киритилган. Расмий ҳужжатда у Ўзбекистон ва Россия фуқаролигига эгалиги кўрсатилган.

Фарғона кимё заводи ва Raw Materials Cellulose ҳақида маълумотлар «Важные истории», Vlast.Kz ва OCCRP ҳамда Рус Би-би-сининг қўшма журналистик тергов ишларида тилга олинган.

Материалларда қайд этилишича, ушбу корхоналар Россиянинг порох заводларига пахта целлюлозасини тўғридан-тўғри ёки хусусий воситачилар орқали етказиб бериш билан шуғулланган. Журналистлар маълум қилишича, 2022 йилда Украинада уруш бошлангандан кейин бу каби етказиб бериш ҳажми сезиларли даражада ошган.