Тошкент, Ўзбекистон (UzDaily.uz) — Украинa финтех-стартапи Fintech Farm Ўзбекистонда янги лойиҳа — Tezbank необанкини ишга туширди. Лойиҳа маҳаллий Hamkorbank билан ҳамкорликда амалга оширилмоқда. Компания учун бу бешинчи бозор бўлиб, ундан олдин Озарбайжон, Қирғизистон, Ҳиндистон ва Вьетнамда иш бошлаган.

Fintech Farm асосчиси Дмитрий Дубилетнинг таъкидлашича, Ўзбекистонга киришдан олдин жамоа бир нечта банклар билан музокаралар олиб борган, бироқ охир-оқибат Hamkorbankни танлаган. Илгари компания Озарбайжонда Leobank, Қирғизистонда Simbank, Ҳиндистонда Roarbank ва Вьетнамда Liobank лойиҳаларини амалга оширган. Шу билан бирга, Нигериядаги уриниш муваффақиятсиз тугади — у ердаги необанк 2023 йилда ёпилган.

Tezbank маҳаллий бозорда рақобатни қулай ва функционал мобил иловаси орқали олиб боришни кўзламоқда. Дубилет таъкидлаганидек, Fintech Farm’нинг турли бозорлардаги асосий маҳсулотлари Украинадаги monobank моделини акс эттиради — ўхшаш шартлар ва хизматлар билан.

Ҳозирнинг ўзидаёқ Hamkorbank асосида мижозларга 50 млн сўмгача (ҳозирги курс бўйича тахминан $4000) кредит лимитига эга бепул карта таклиф қилинмоқда. Карта 62 кунгача имтиёзли муддат ҳамда харидлардан 10 фоиз кэшбэкни назарда тутади.

2024 йил май ойида Forbes Ukraine Fintech Farm’нинг Қирғизистон, Ҳиндистон ва эҳтимолан Марокашга кенгайиш режалари ҳақида ёзган эди.

Шунда компания $32 млн инвестиция раундини узайтиришини маълум қилган, раунднинг етакчи инвестори Лондон фонд биржасида акциялари муомала қиладиган Bank of Georgia бўлган. 2023 йилда маблағ жалб қилинганидан сўнг Fintech Farm’нинг баҳоси $100 млн’дан ошди, 2024 йил бошида эса компания 40 та янги иш ўрни очди, шу жумладан украин мутахассислари учун ҳам.

Fintech Farm — 2020 йилда украин тадбиркорлари Дмитрий Дубилет, Александр Витяз ва Николай Безкровний томонидан асос солинган Лондондаги финтех-компания. Стартапнинг бизнес-модели миллий банклар билан ҳамкорликда необанклар ташкил этишга асосланган. Бугунги кунда компаниянинг лойиҳалари Озарбайжон, Вьетнам, Қирғизистон, Ҳиндистон ва энди Ўзбекистонда ҳам фаолият юритмоқда.