Тошкент, Ўзбекистон (UzDaily.uz) — Фавқулодда ҳолатдан жабр кўрган 165 тадбиркор учун 63 та бўш дўкон ажратилди. Яна 125 нафар тадбиркор икки ой мобайнида ижара тўловидан озод этилди. Майдони 12 кв. м бўлган 56 та савдо жойига 112 тадбиркор жойлаштирилди, майдони 24 кв. м бўлган икки дўконга саккиз киши, 9 кв. м бўлган беш савдо нуқтасига эса беш тадбиркор жойлашди. Саккиз тадбиркор таклиф қилинган ёрдамдан воз кечиб, фаолиятини тўхтатишга қарор қилди, яна тўрт нафар тадбиркор дўкон сотиб олиш ниятида бўлган, аммо ариза тақдим этмаган.

14 август куни Тошкент вилояти ҳокими Зойир Мирзаев билан учрашувда тадбиркорларга бозорнинг кейинги тақдири ер участкаси эгаси бўлган Тошкент метрополитени томонидан ҳал этилиши айтилди. Режага кўра, 2026 йил март ойида мазкур ҳудудда метро учун зарур инфратузилма объекти қурилиши бошланади. Мирзаев тадбиркорларга пойтахт метрополитени раҳбари Раҳмонбек Усмоновнинг телефон орқали йўллаган мурожаатини етказди.

15 августдан жабр кўрган тадбиркорлар бозорнинг зарар етмаган қисмига кўчишни бошлади. Очилиш куни Зойир Мирзаев ҳар бир ижарачи билан шахсан суҳбатлашишини ваъда қилди. Бўш савдо жойларининг адолатли тақсимланишини тадбиркорлар ҳамжамияти вакиллари назорат қилади.

Тошкент вилояти прокурори Азамат Мирзаев маълум қилишича, ёнғин ҳолатини аниқлаш ва ҳуқуқий баҳо бериш учун 40 нафар терговчидан иборат гуруҳ тузилган. Бозор ҳудудида сайёр штаб шаклида тезкор суриштирув ва тергов ҳаракатлари олиб борилмоқда.

Ҳокимлик матбуот хизмати маълумотларига кўра, ёнғиндан етган зарар тахминан 74 млрд сўмга (Марказий банк курси бўйича 5,88 млн доллар) баҳоланмоқда. 8 минг кв. м майдонни қамраб олган ёнғинга «Уч қаҳрамон ихтисослашган савдо мажмуаси» МЧЖ масъул шахслари томонидан ёнғин хавфсизлиги қоидаларига риоя этилмагани сабаб бўлган. Тошкент тумани ИИБ тергов бўлими Ўзбекистон Республикаси Жиноят кодексининг 259-моддаси 2-қисми «б» банди — ёнғин хавфсизлиги қоидаларини бузиш айби бўйича жиноят иши қўзғатди. Материаллар Тошкент вилояти ИИББ ҳузуридаги Тергов бошқармасига топширилди.

Дастлабки маълумотларга кўра, ёнғинга бозор кириш қисмидаги биринчи ва иккинчи дўконлар ўртасидаги электр симлари аварияси (ортиқча юклама, ўтиш қаршилигининг ошиши) сабаб бўлган. Ёниб кетиш сабабини аниқ белгилаш учун Х. Сулайманова номидаги Республика суд-экспертиза маркази, Ёнғин хавфсизлиги академияси ва бошқа тузилмалар мутахассислари воқеа жойини кўздан кечириб, айрим далилларни олиб комплекс суд-экспертиза тайинлади.

Жами ёнғин оқибатида 137 тадбиркор зарар кўрган бўлиб, уларнинг 181 та савдо жойи ва 76 та бўш дўконига шикаст етган. Блоклар бўйича: А блокда — 78 тадбиркор (106 дўкон), С блокда — 11 тадбиркор (19 дўкон), Е блокда — 48 тадбиркор (56 дўкон).

Ёнғин бозордаги ишлайдиган дўконларнинг қарийб ярмини — 567 та дўкондан 257 тасини (45 фоиздан ортиқ) шикастлади. Умуман бозорда 900 дан ортиқ савдо нуқтаси мавжуд.

Ёнғин 11 август кунига ўтар кечаси содир бўлган. ФВВга хабар соат 02:22 да келиб тушган, ортидан етти дақиқа ичида ўт ўчирувчи-қутқарувчи гуруҳлар воқеа жойига етиб келган. Оловни тўлиқ ўчириш учун 10 та экипаж иштирок этган ва икки соатдан ортиқ вақт сарфланган.

Ҳуқуқни муҳофаза қилувчи органлар баҳосига кўра, ёнғин бозор майдонининг тахминан 40 фоизини йўқ қилган, аммо тезкор ҳаракатлар натижасида умумий 20 минг кв. м майдондан 12 минг кв. м савдо ҳудуди сақлаб қолинган. Ҳалок бўлганлар ёки жароҳат олганлар ҳақида хабар берилмаган.