Туркиянинг Unirex компанияси билан ҳамкорлик масалалари муҳокама қилинди

Тошкент, Ўзбекистон (UzDaily.uz) — Фармацевтика тармоғини ривожлантириш агентлиги директори Абдулла Азизов Туркиянинг “Unirex” компанияси директори Атилла Алтинкая ҳамда компания делегацияси иштирокида учрашув ўтказди.

Учрашувда ҳамкорликни кенгайтириш ва узоқ муддатли шериклик форматларини белгилаш, ишлаб чиқариш қувватларини ташкил этиш, жумладан заводлар қурилиши, маҳсулотларни дистрибуция қилиш ҳамда таъминот занжирини самарали йўлга қўйиш масалалари атрофлича муҳокама қилинди.

Шунингдек, компания вакиллари мамлакатимизда фармацевтика соҳасини ривожлантириш бўйича сўнгги йилларда амалга оширилган ишлар, инфратузилмани такомиллаштириш ва ислоҳотлар натижаларига юқори баҳо бериб, кенг кўламли ўзгаришлар катта таассурот қолдирганини таъкидладилар.

Учрашув якунида томонлар ҳамкорликни амалий босқичга олиб чиқиш, аниқ таклифлар ва механизмларни ишлаб чиқиш ҳамда кейинги музокараларни давом эттириш масалалари юзасидан келишиб олдилар.