Тошкент, Ўзбекистон (UzDaily.uz) — Жорий йилнинг 27 январь куни Ўзбекистон Республикаси Бош вазири ўринбосари – Иқтисодиёт ва молия вазири Жамшид Қўчқоров ҳамда Туркиянинг “BATTAL Holding” компанияси бош директори Мехмет Берат Баттал ўртасида учрашув бўлиб ўтди.

Маълумот учун: “BATTAL Holding” 1958 йил Истанбулда ташкил этилган. Холдинг таркибига “Turk ilac ve serum sanayi A.S.” компанияси киради. Компания махсус зардоблар, вакциналар, антибиотиклар, флаконлар, ампулалар ишлаб чиқаради. Компаниянинг йиллик даромади 200 млн АҚШ долларини ташкил этади (2022 йил). Охирги 5 йил ичида ўртача 15% молиявий ўсиш кўрсатилган. Компания 30 дан ортиқ давлатларга ўз маҳсулотларини экспорт қилиб келмоқда.

Учрашувда Ўзбекистон Республикаси ҳамда Туркия Республикаси ўртасида ҳамкорликнинг 6 та муҳим йўналишида, хусусан, фармацевтика соҳасида икки томонлама манфаатли алоқаларни ривожлантириш, шунингдек, халқаро тажриба ҳамда замонавий ёндашувини ўрганиш муҳимлиги таъкидланди.

Мулоқот давомида томонлар мамлакатимизда соғлиқни сақлаш тизимини ривожлантириш, хусусан, фармацевтика соҳасида янги лойиҳаларни шакллантириш, соҳага замонавий технологияларни жалб этиш ҳамда дори-дармон воситаларни ишлаб чиқаришни маҳаллийлаштириш, шунингдек, ўзаро ҳамкорлик истиқболларини муҳокама қилди.

Учрашув мобайнида “BATTAL Holding”  компанияси ва Фармацевтика тармоғини ривожлантириш агентлиги ўртасида Ўзбекистонда парентерал дори маҳсулотларини ишлаб чиқариш лойиҳасини амалга ошириш бўйича Англашув Меморандуми имзоланди.

Маълумот учун: Хорижий инвесторнинг бирламчи ҳисоб-китобларига мувофиқ, лойиҳанинг қиймати 30 млн долларни ташкил этиб, 500 ишчи ўрни ва йилига 80 млн дона дори маҳсулотларини ишлаб чиқариш имкониятини яратади.

Шу билан бирга, муҳокамалар давомида “BATTAL Holding”  компаниясининг фаолият йўналишлари, ишлаб чиқариш кўлами ҳамда тажриба ва салоҳияти юзасидан фикр алмашди.

Музокаралар якунида томонлар икки мамлакат ўртасида ўзаро ҳамкорлик алоқаларини ривожлантириш ва мустаҳкамлаш ҳамда белгиланган мақсадларга етишда самарали ва тизимли фаолият олиб боришга келишиб олди.