Туркия Президенти Ғазога ёрдам олиб кетаётган кемаларга қилинган ҳужумни қоралади

Тошкент, Ўзбекистон (UzDaily.uz) — Туркия Президенти Ражаб Тоййиб Эрдўғон Ғаза аҳолиси учун гуманитар ёрдам олиб кетаётган халқаро Global Sumud флотилиясини Исроил томонидан нишонга олинишини кескин қоралади.

Ҳукумрон Адолат ва тараққиёт партияси (ПСР) тадбирида сўзлаган Эрдўғон воқеани «бандитлик ҳаракатлари» деб атади ва Туркия миссия иштирокчиларининг барчасини қўллаб-қувватлашини таъкидлади. У мазкур ташаббусни «инсониятнинг умумий виждони ифодаси» сифатида баҳолади.

Туркия раҳбарининг сўзларига кўра, флотилиянинг асосий мақсадларидан бири жаҳон жамоатчилигини «Ғазода болаларнинг очликдан ҳалок бўлишига сабаб бўлаётган ваҳшийлик»ка эътибор қаратиш эди.

Эрдўғон Global Sumud «Ғазода амалга оширилаётган шафқатсизлик ва Исроилнинг қонли моҳиятини яна бир бор бутун дунёга намоён этди» дея таъкидлади.

Шунингдек, у Исроил Бош вазири Биньямин Нетаньяҳуни «геноцид ҳукумати» деб атаб, унинг маъмурияти нафақат тинчлик ўрнатишга тўсқинлик қилаётганини, балки «бунга имконият пайдо бўлишига ҳам йўл қўймаётганини» билдирди.

Давлат раҳбари Туркия ўзининг «фаластинлик биродарларини ёлғиз қолдирмаслиги»ни ва ўт очишни тўхтатиш ҳамда тинчликка эришиш йўлидаги саъй-ҳаракатларни давом эттиришини маълум қилди.

Унинг қайд этишича, «халқаро сувларда тинч аҳолига қарши қилинган ҳужум» Исроил ҳокимиятининг Ғазода амалга ошираётган ҳаракатларини яшириш уринишларининг яна бир исботидир.

Президент қўшимча қилди: Туркия муассасалари Global Sumud флотилиясига қилинган ҳужум билан боғлиқ вазиятни диққат билан кузатмоқда ва бортда бўлган турк фуқароларининг хавфсизлигини таъминлаш чораларини кўрмоқда.