Тошкент, Ўзбекистон (UzDaily.uz) — Жорий йилнинг 24 февраль – 1 март кунлари Ўзбекистон Республикаси Иқтисодиёт ва молия вазирлиги ҳамда Туркия ҳамкорлик ва мувофиқлаштириш агентлиги (TIKA) ҳамкорлигида Туркиянинг заргарлик ва шиша маҳсулотлари ишлаб чиқариш соҳасидаги етакчи экспертлари иштирокида ўқув семинарлари ташкил этилди. Ушбу ташриф доирасида мутахассислар соҳанинг долзарб йўналишлари бўйича тажриба алмашиш, ишлаб чиқариш жараёнларининг замонавий усуллари билан танишиш ва икки томонлама ҳамкорликни янада ривожлантириш имкониятига эга бўлди.

Мазкур семинар ва тренинглар 2024 йил июнь ойида Анқара шаҳрида бўлиб ўтган Ўзбекистон ва Туркия ўртасидаги Стратегик шериклик кенгашининг учинчи йиғилиши натижасида эришилган келишувларнинг амалий натижаларидан бири ҳисобланади. Давлатлар раҳбарлари томонидан белгиланган устувор йўналишлардан бири сифатида иқтисодий ҳамкорликни кенгайтириш ва саноат тармоқларида тажриба алмашишни ривожлантиришдан иборат.

Ушбу ташаббус икки давлат ўртасидаги иқтисодий ҳамкорликни мустаҳкамлаш билан бир қаторда, маҳаллий ишлаб чиқарувчиларнинг малакасини ошириш ва уларнинг халқаро бозорга чиқиш имкониятларини кенгайтиришга хизмат қилади.

Жорий йилнинг 1 март куни семинарларнинг якуний қисми сифатида иштирокчиларни тақдирлаш маросими бўлиб ўтди. ТIKA томонидан тренингларда фаол иштирок этган мутахассисларга махсус сертификатлар топширилди.

Шунингдек, ТIKA томонидан Ўзбекистон Республикаси Иқтисодиёт ва молия вазирлигига 3D принтери грант асосида, беғараз кўмак сифатида тақдим этилди. Ўз навбатида, Иқтисодиёт ва молия вазирлиги ушбу илғор технологик ускунани заргарлик маҳсулотлари дизайни ва ишлаб чиқариш жараёнларини янада замонавийлаштиришни таълимга жорий этиш мақсадида Тошкент давлат техника университетига топширди. 3D технологиялари орқали янги дизайнларни синаб кўриш, тайёр маҳсулот сифатини ошириш ва ишлаб чиқариш жараёнларини оптималлаштириш имконияти яратилади.

Туркиялик экспертлар билан заргарлик ва шиша маҳсулотларини ишлаб чиқаришга ихтисослашган маҳаллий корхоналар мутахассислари иштирокидаги давра суҳбатлари ва амалий тренинглар давомида қуйидаги мавзуларга алоҳида эътибор қаратилди:

Заргарлик маҳсулотларини ишлаб чиқаришнинг замонавий технологиялари – дизайн яратиш, материалларни қайта ишлаш ва сифат назоратининг инновацион усуллари;

Шиша буюмлар ишлаб чиқаришда янги технологиялар – экологик тоза ва энергия самарадор ишлаб чиқариш усуллари;

Халқаро бозорга чиқиш стратегиялари – экспорт салоҳиятини ошириш, бренд яратиш ва маҳсулотларни халқаро стандартларга мослаштириш йўллари.

Иштирокчилар Туркиянинг замонавий технологиялар ва илғор амалиётларга асосланган ишлаб чиқариш тажрибаси билан танишди. Шунингдек, маҳаллий соҳа вакиллари ўз тажрибаларини бўлишиб, шиша ва заргарлик саноатининг ўзига хос жиҳатлари бўйича фикр алмашди.

Бундан ташқари, ойна листларга ишлов бериш, қайта ишлаш корхонаси «GLASS-EXPO» МЧЖ, озиқ-овқат ва фармацевтика саноати учун шиша идишлар ишлаб чиқарувчи Марказий Осиёдаги йирик корхоналардан бири ҳисобланадиган «CAMPALIA» МЧЖ ХК ҳамда заргарлик соҳасида «Фонон» бренди остида фаолият юритаётган “Gold Moon Tashkent” МЧЖ корхоналари фаолияти билан яқиндан танишилди.

Ташриф якунлари бўйича томонлар ҳамкорликни давом эттиришга келишиб олди. Жумладан, маҳаллий мутахассислар ва ишлаб чиқарувчиларнинг Туркияда малака ошириш курсларида иштирок этиши ҳамда илғор технологиялар бўйича қўшимча тренинглар ташкил этилиши режалаштирилмоқда.