Турк компаниялари Янги Тошкент учун стадион концепциясини тақдим этди

Тошкент, Ўзбекистон (UzDaily.uz) — Ўзбекистон футбол ассоциациясида Туркиянинг етакчи қурилиш компаниялари билан учрашув бўлиб ўтди.

Мазкур учрашув давомида Туркиянинг йирик қурилиш компаниялари — “KOC Construction” ва “Bahadir Kul Architects” вакиллари Ўзбекистонда барпо этилиши режалаштирилаётган Янги Тошкент Марказий футбол ўйингоҳи бўйича ўзларининг консептуал лойиҳаларини тақдим этдилар.

Тақдимот жараёнида меҳмонлар стадионнинг архитектура ечимлари, конструктив имкониятлари, мухлислар учун яратиладиган замонавий инфратузилма ва хавфсизлик тизимлари, шунингдек, спортчилар ҳамда техник ходимлар учун мўлжалланган ички мажмуалар ҳақида батафсил маълумот бердилар.

ЎФА раҳбарияти лойиҳа бўйича ўз таклиф ва тавсияларини билдириб, стадион қурилишида барча техник меъёрлар ва жараёнларнинг  FIFA талабларига тўлиқ мос бўлиши зарурлигини алоҳида таъкидлади. Шунингдек, мухлислар, мутахассислар ва ОАВ вакиллари учун энг замонавий шароитлар яратилиши лозимлиги қайд этилди.

Учрашув якунида томонлар келгусида ҳамкорликни давом эттириш ва лойиҳани янада такомиллаштириш юзасидан келишиб олдилар.