TrinaTracker Ўзбекистондаги лойиҳа учун 363 МВт қувватга эга қуёш трекерларини етказиб бериш бўйича шартнома тузди

Тошкент, Ўзбекистон (UzDaily.uz) — Trinasolar компаниясининг бизнес бўлими ҳисобланган ва дунёдаги етакчи интеллектуал қуёш трекер ечимлари таъминловчиларидан бири — TrinaTracker Навоий вилоятидаги фотоэлектр станцияси учун 363 МВт қувватга эга қуёш трекер тизимларини етказиб бериш бўйича шартнома имзолади.

Бу йирик буюртма компаниянинг Марказий Осиёдаги навбатдаги муҳим қадами бўлиб, унинг технологик етакчилиги, маҳсулотларининг ишончлилиги ва лойиҳаларни амалга оширишдаги юқори стандартларини яна бир бор тасдиқлади. Янги шартнома билан TrinaTracker томонидан Ўзбекистонга етказиб берилаётган умумий қувват 1 ГВтдан ошиб кетди.

Навоий вилоятидаги лойиҳа China Energy Engineering Overseas Investment Company томонидан молиялаштирилмоқда ва TrinaTracker ишлаб чиқарган Vanguard 1P туридаги 7 267 та бир ўқли трекер тўпламларини ўрнатишни назарда тутади.

Ҳудуднинг мураккаб геологик ва иқлимий шароити туфайли лойиҳани амалга ошириш жиддий муҳандислик муаммолари билан боғлиқ. Ёз ойларида ҳаво ҳарорати 48°C гача етса, шамол тезлиги соатига 52,3 м/с ни ташкил этади, ер юзаси эса диаметри 200 мм гача бўлган қаттиқ тошлар билан қопланган бўлиб, қурилиш жараёнини айни вақтда жуда меҳнатталаб қилади.

TrinaTracker ўзининг техникавий салоҳияти ва катта тажрибасига таянадиган ҳолда, тизимнинг узоқ муддатли ишончлилигини таъминлайдиган индивидуал ечим ишлаб чиқди. Vanguard 1P трекерлари тузилмавий ва аэродинамик синовлардан тўлиқ ўтган бўлиб, кучли шамоллар ҳамда экстремал ҳароратларга юқори чидамлиликни намоён этади ва 25 йиллик эксплуатация даври мобайнида барқарор ишлашни кафолатлайди.

Лойиҳа Ўзбекистоннинг 2030 йилгача қайта тикланувчи энергия манбалари улушини 25 фоизга етказиш бўйича миллий стратегиясини қўллаб-қувватлайди ҳамда мамлакатнинг энергетик трансформацияси ва барқарор тараққиётига салмоқли ҳисса қўшади. Лойиҳа фойдаланишга топширилгандан сўнг, станция йилига тахминан 700 миллион кВт·соат тоза электр энергияси ишлаб чиқаради, бу эса 220 минг тонна кўмир истеъмолини қисқартириш ва СО₂ чиқиндиларини ҳар йили 600 минг тоннага камайтириш имконини беради.

TrinaTracker президенти Альваро Гарсия Мальтрас шундай деди: «Биз Ўзбекистонда “яшил” энергетикани ривожлантиришда яна иштирок этаётганимиздан мамнунмиз. Навоий вилоятидаги лойиҳа бўйича шартнома имзоланиши бозорнинг бизнинг бренд ва имкониятларимизга бўлган ишончини намоён этади. Биз юқори сифатли лойиҳаларни етказиб бериш ва уларнинг узоқ муддатли ишончли фаолиятини таъминлашга содиқмиз, бу эса янада барқарор келажакни яратишга хизмат қилади».