Тошкент, Ўзбекистон (UzDaily.uz) — 18 март куни Транспорт вазири Илҳом Махкамов Европа Иттифоқининг Халқаро ҳамкорлик бўйича комиссари Йозеф Сикела бошчилигидаги делегацияси вакиллари билан музокаралар ўтказди.

Томонлар Европа Иттифоқи ҳамда Ўзбекистон ўртасида транспорт ва логистика соҳасидаги ҳамкорликнинг устувор йўналишларини муҳокама этишди.

Бунда «Global Gateway» дастури доирасидаги инфратузилма лойиҳаларини амалга оширишга, хусусан, Учқудуқ-Қизилўрда янги темир йўл ва автомобиль йўлини қуриш лойиҳаларига тўхталиб ўтилди. Шунингдек, ўзаро савдо ҳажмини ошириш мақсадида Транскаспий транспорт йўлагини ривожлантириш масаласига алоҳида эътибор қаратилди.

И.Махкамов Ўзбекистоннинг Европа транспорт вазирлари конференцияси (ECMT) кўп томонлама рухсатномалар тизимига қўшилишида Европа Иттифоқининг ёрдами масаласига алоҳида тўхталиб ўтди. Шунингдек, Ўзбекистон Республикаси ҳудудида қўшма саноат-логистика паркларини ташкил этиш имкониятини кўриб чиқишни таклиф этди.