Тошкент, Ўзбекистон (UzDaily.uz) — Транс-Афғонистон темир йўлини қуриш Афғонистон Иқтисодиёт вазирлиги учун асосий устувор вазифалардан бири ҳисобланади, деб хабар берди TOLO News агентлиги вазирликнинг расмий вакили Абдул Раҳмон Ҳабибнинг сўзларига таянган ҳолда.

Абдул Раҳмон Ҳабиб ушбу лойиҳанинг аҳамиятини таъкидлаб, шундай деди:
«Транс-Афғонистон лойиҳаси савдони мустаҳкамлаш, иш ўринлари яратиш ва иқтисодий инфратузилмани ривожлантиришда ҳал қилувчи аҳамиятга эга. Ушбу лойиҳа транзит коридори сифатида Афғонистонни Эрон, Покистон, Хитой ва Туркманистон каби қўшни давлатлар билан боғлаб, халқаро савдони сезиларли даражада мустаҳкамлайди».

Иқтисодий экспертлар фикрича, ушбу лойиҳани амалга ошириш Афғонистон иқтисодиётини тубдан ўзгартириши ва Покистон ҳамда Ўзбекистон учун катта фойда келтириши мумкин.

Кобул Саноатчилар ассоциацияси раиси Абдул Жаббор Сафи шундай деди:
«Темир йўлга уланиш импорт ва экспорт харажатларини камайтиради, бу эса халқаро бозорларда бизга қулайроқ мавқе эгаллаш ва фойда олиш имконини беради».

Иқтисодий масалалар бўйича эксперт Забиҳуллоҳ Исломий қуйидагича фикр билдирди:
«Бу лойиҳа билан Афғонистон транзит йўлига айланади. Ушбу темир йўл Ўзбекистон ва Покистон ўртасида товарларни ташишни таъминлайди ва бу Афғонистонга катта иқтисодий фойда келтиради ҳамда мамлакатнинг иқтисодий барқарорлигига хизмат қилади».

Транс-Афғонистон лойиҳасининг мақсади Афғонистон, Покистон ва Ўзбекистонни темир йўл орқали боғлаш бўлиб, лойиҳа қиймати тахминан 5 миллиард долларни ташкил қилади.